Bandièra01 1180x150: Comuna de Tolosa

Actualitats

Brasília: una vertadièra operacion de guèrra per protegir la presa de possession de Bolsonaro

Se ten aqueste ser la ceremònia de nominacion del candidat ultradrechista coma president de Brasil. L’eveniment se considèra de naut risc e an installat un dispositiu de seguretat inedit

| TV Globo
Una vertadièra operacion de guèrra s’es organizada uèi a Brasília per la presa de possession de l’ultradrechista Jair Bolsonaro coma president de Brasil, que començarà uèi a 17h segon l’ora locala (a 20h en Occitània).
 
L’eveniment se considèra de naut risc e an installat un dispositiu de seguretat inedit qu’inclutz plusors elicoptèrs e quitament un sistèma antimissils. E mai, un decret del president sortent, Michel Temer, autoriza que se pòscan abatre d’avions ostils en cas de menaça per la seguretat pendent la ceremònia mentre que la capitala brasilièra es venguda una fortalesa amb de milièrs de policièrs e militars mobilizats per garentir la seguretat. Se prevei l’assisténcia de mièg milion de personas e d’aperaquí una dotzena de caps d’estat e de govèrn e de 60 delegacions internacionalas.
 
Un dels discorses mai repetits pels seguidors de Bolsonaro es que lo nòu govèrn romprà amb “un sistèma criminal que s’èra perpetuat pendent fòrça ans”. Lo fach, doncas, de blindar la seguretat d’aqueste biais poiriá refortir aquela idèa de criminalitat del govèrn precedent d’esquèrra.
 
Pasmens, Bolsonaro foguèt victima d’un atemptat pendent la campanha electorala, çò que l’ajudèt a ganhar de vòtes. Ara, son eleccion a polarizat la societat brasilièra. Bolsonaro se presentèt pel Partit Social Liberal, lo noven partit que participa a las eleccions dempuèi 1989. El defend la dictatura militara de 1964 e es partisan de la venda liura d’armas. En mai d’aquò, es un opausant afogat dels dreches dels omosexuals e defend que la tortura es un metòde legitim. D’efièch, es estat tres còps jutjat per d’insultes e prepauses racistas e omofòbs.
 

Una tendéncia globala de l’extrèma drecha
 
Bolsonaro jonh una tièra de caps d’estat autoritaris e antiecologistas: Donald Trump cèrca de reviscolar lo carbon del temps que lucha contra “la burocracia environamentala”, las monarquias del golf Persic esplechan lo petròli, lo nòu regim polonés d’extrèma drecha defend las extraccions de las minas de carbon coma un afar nacional...
 
En mai d’aquò, lo sosten a las indústrias polluentas es sovent acompanhat de violéncias contra los activistas de l’environament. Dels 207 assassinats restacats a de questions environamentalas en 2017, mai de la mitat se faguèron en Brasil e a las Filipinas. La majoritat d’aquelas mòrts foguèron causadas per de milícias armadas irregularas.
 
A las Filipinas lo 90% dels assassinats d’activistas son atribuables al govèrn de Rodrigo Duterte. Dins los autres cases, lo govèrn autoriza e encoratja las indústrias agricòlas e minièras a menaçar e assassinar per mejan de la liberalizacion de la possession d’armas. 


Lo candidat dels “fazendeiros”
 
Los diches “fazendeiros” son de grands entrepreneires agricòlas e elevaires, que foguèron fòrça favorits pendent la dictatura militara de Brasil, quand desplacèron de milièrs d’indigènas de lor país. Quand la dictatura tombèt, en 1985, comencèt lo retorn, mas los indigènas rescontrèron la resisténcia armada dels quites fazendeiros e dels esbirros qu’aquestes engatjavan, los jagunços. La violéncia dura ja dempuèi d’ans.
 
Son l’1% de la populacion mas son proprietaris del 45% de l’espaci rural. Aquela enòrma minoritat entamenèt una campanha contra l’Acòrdi de París sul Clima car aqueste prevei de reduire las emissions de gases polluents, de tornar plantar dotze milions d’ectaras de bòsques, de protegir los territòris dels pòbles originaris e d’aplicar de politicas favorablas al mièg milion de familhas de païsans sens tèrras. Lo Partit dels Trabalhadors (de Rousseff e Lula da Silva) èra en favor d’aquel acòrdi.
 
Ara, la victòria de Bolsonaro nos mena devèrs la dominacion del lobby apelat BBB (Buòus, Balas e Bíblia) e sembla que degun poirà pas arrestar l’expansion dels semenaires de sòja OGM e dels grands elevaires, mai que mai dins un país governat per un president que revendica dobèrtament l’òdi dels pòbles indigènas, lo mesprètz dels païsans sens tèrras e lo desir de metre fin a l’activisme ecologista.
 
Segon de donadas del Ministèri de l’Agricultura de Brasil, los coitius de sòja OGM an crescut d’un 60% dins los darrièrs dètz ans. La sòja representa gaireben la mitat de la produccion agricòla del país, dont lo 30% se concentra dins l’estat amazonian de Mato Grosso. Tanben lo coitiu de la cana de sucre e l’elevatge an crescut d’un 60% dins aquel meteis periòde. Brasil es lo segond productor elevaire mondial e lo comèrci de la carn a aumentat biais fòl. Un bistèc sus cinc dels que se manjan sus la planeta proven de Brasil. L’elevatge es en creissença mai que mai en Amazonia.
  
 
La menaça sus la forèst amazoniana
 
La victòria de Bolsonaro es mai enquietanta que cap d’autra a respècte del mal que pòt causar a la forèst amazoniana, l’espaci de preservar pus essencial de la planeta.
 
Aquela selva cobrís 5,5 milions de quilomètres cairats, çò es la mitat dels bòsques tropicals del Mond, aperaquí 29 còps la superfícia d’Occitània tota. Es lo sit de la biodiversitat pus grand del Mond, conten lo 15% de tota l’aiga doça del Mond, contribuís a la produccion del 20% de l’oxigèn e es un regulator natural de l’escalfament mondial.
 
Segon l’Organizacion de las Nacions Unidas per l’Agricultura e l’Alimentacion, l’Amazonia a una populacion de 33 milions de personas que dependon de sas ressorsas. Es tanben lo territòri de mai d’un centenat de milièrs d’indigènas. La Fondacion Nacionala de l’Indian (FUNAI) a 900 000 personas en Brasil, devesidas en 305 grops etnics qu’ocupan 594 territòris que representan lo 12% del país. Pasmens, lo Congrès pòt modificar l’usatge de las tèrras declaradas inalienablas dins la Constitucion de 1988.
 
Près del 65% de la forèst amazoniana se situa en Brasil. Mas aquel país es lo campion mondial de la desforestacion dins los darrièrs cinquanta ans, amb una destruccion de gaireben 780 000km², çò es mai de quatre còps l’extension d’Occitània. Pendent aquel periòde, l’Amazonia brasilièra perdèt lo 20% de sa superfícia. L’elevatge es la principala causa de la desforestacion, pr’amor que lo 65% de las tèrras desforestadas son emplegadas per l’elevatge. L’agricultura intensiva, pus concretament lo coitiu de la sòja e de la cana de sucre, a tanben una part de responsabilitat, mas representa solament entre lo 5% e lo 10%. Totun, dins lo cas de la sòja, o cal estudiar mai a fons car se consagra una granda part d’aquel coitiu a la produccion de mangisca pel bestial.
 
Fin finala, lo coitiu de sòja e de la cana de sucre son tanben de causas de desforestacion en rason de l’infrastructura estradièra que la requerís lo transpòrt dels coitius.
 
 
Quitar l’Acòrdi de París
 
Durant sa campanha, Bolsonaro diguèt que retirariá Brasil de l’Acòrdi de París sul Cambiament Climatic de l’an 2015. Sos arguments son que l’escalfament global seriá pas mai que “de faulas”. Esperem que son poder per inversar aquela situacion siá limitat, pr’amor que l’Acòrdi de París foguèt aprovat per l’assemblada dels deputats de Brasil, qu’a l’ora d’ara es compausat d’una trentena de partits.
 
 
 


abonar los amics de Jornalet
 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

La Nièira
3.

A! Cal reconéisser que lo Castaner es un pauc cortet davant aquel desplegament de fòrça.

  • 2
  • 0
Pierre Terral
2.

Aquí un article interessant ambe plan de chifres. I manca pas qu'una causa, los de la demografia. Entre 1975 e uèi la populacion a doblat mas pas la superficia del país. La deforestacion comencèt plan abanç Bolsonaro. Cal noirir lo monde. Lo pus gròs problème de nòstra epòca es pas lo rescalfament climatique, coma voldrián o nos far engolar, mas siben la demografia explosiva. E Bolsonaro a pas la clau de las braguetas.
Los indigènes qu'an una demografia bassa, pas d'estat nacional protector, someses a una immigracion agressiva a forta demografia son malurosament condemnats, coma nosaus occitans, a disparéisser.
E enfin "(Buòus, Balas e Bíblia)" : D'aprèp çò que sabi de Adam a 1935 se disiá "Bibla", "Bíblia" es un catalanisme d'Alibert qu'a pas cap de justificacion.
Bona annada a totes çaquelà !

  • 7
  • 6
Mèfi! 31
1.

Lobby BBB
Bolsonaro, Trump... ambe'l sostèn decisiu del crestianisme fondamentalista...
La manipola de las masses d'ambe la Bíblia...aquell forraborra mitologic...
Extrèma dreita ? Non pas, se que de non radicalisme antisocial ...

  • 5
  • 6

Escriu un comentari sus aqueste article