Bandièra01 1180x150: Comuna de Tolosa

Actualitats

Libertat lançarà una campanha per l’oficialitat de l’occitan

Amb la tòca que la lenga prenga sa vertadièra plaça, Libertat apèla a jónher sa campanha totes los collectius que se reconescan dins aquel combat

Besièrs 2005
Besièrs 2005 | ScArf
Libertat, lo movement de l’esquèrra revolucionària d’Occitània, lançarà una campanha per l’oficialitat de la lenga occitana a la fin de febrièr. La revendicacion cèrca que l’occitan “torne préner la vertadèra plaça on deveré estar”, e per tant, que la lenga siá oficiala dins l’educacion de la mairala fins a l’universitat e dins totes los luòcs de formacion, dins las administracions e los servicis publics, dins totes los luòcs publics, los mèdias e la vida vidanta.
 
 
Crida a l’unitat d’accion
 
Per menar a bon tèrme aquesta campanha, la còla de Libertat fan una crida a totes los collectius que se reconesgan dins aquel combat per se mobilizar “entà qu’en Occitània sancèra la luta s’espandesca tà que la lenga nosta e sia arreconeguda com tau e dab lo prètzhèit de la soa oficializacion”.
 
Per aquela rason, demandan a totòm que vòlga debatre, bastir e participar a la campanha de contactar l’e-mail libertat.occitania@gmail... La còla soslinha que “ni Libertat, ni nada organizacion mei, per tan grana que sia, non pòt pas ganhar sola aqueth combat, pr’amor sonque lo pòble occitan e pòt arresòlver los problèmas sons”.
 
 
Es vengut lo temps de nos afirmar
 
Lo combat per la lenga es fondamental, segon la còla de Libertat, que denóncia una colonizacion dels “eleits parisianistas qui ns’apèran provinciaus” e “lo mesprètz de l’estat francés per çò qui èm: un pòble”.
 
“Que’ns vòlen honuts hens un gran ensemble francés uniformizat, que pensan que las decisions politicas non pòden pas estar presas qu’a París… qu’apèran la lenga nosta patés e que la volerén estupada”, çò remembran. Per aquela rason creson “qu’ei vengut lo temps de ns’afirmar e d’entinoar la construccion deu noste aviéner comun”, car la “lenga nosta que hè partida de çò qui èm e de çò qui seram”.

 

 
 




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

L\'Oc Com\'
18.

#17 Ah ! De que se faria pas per lo fetichisma del drapèl occitan !

  • 2
  • 4
Miquel Jaunàs Aquo balança plan a Tolosa
17.

#13 Lo mond virtual d'una Occitània qu'existis pas l'avem quotidianament dins Jornalet, autant qu'en legissent Tolkien n'as un polit de mond virtual. E qu'enchaut ? La prova que Jornalet a pas una armada d'emplegats, foguèssen nord-coreans, per colorar lo mond en oc, es que nos repassa totjorn la MESMA fotografia-gag facha per un de sos colègas. Pas besonh de foto-shop per aquo, un smartfon e doas o tres companhs desguisats, e tenes sul pic de fotos d'Halloween pus polidas que natura. O coma aqui de ferotges gilets jaunes qu'enauçarian fierament la bandièra occitana.

  • 12
  • 6
Gerard Joan Barceló Pèiralata
16.

#15 Me sembla que la fòto pretend pas d'èsser actuala, puèi que n'indica clarament la data: la manifestacion per l'occitan de Besièrs en 2005. A mon vejaire, es un mejan de dire simplament que la revendicacion per l'oficialitat de l'occitana es pas novèla. E s'apren pas a Jornalet se l'occitanisme l'a pas revendicada dempuèi aquela data!

E se qualqu'un a de fòtos mai recentas, son benvengudas...

  • 10
  • 0
pjm pjm
15.

#14 m'èri pas quitament mainat, d'alhors, que la fòto representa pas un seguici de Libertat ! mès un d'Anaram Au Patac...
damb atau una logica, remarcatz, pòden ilustrar l'article sus la victòria de l'OM contra Andresièus damb un imatge de Didier Drogba ; o alara un article sus la politica sociala de la comuna de Tolosa damb una fòto de Dosta-Blasit ; o encara un tèxte pertocant l'Estivada 2022 (quò's un subjècte qu'interessa l'occitanISME) damb un pertrèit deu Patric Rós !

  • 6
  • 13
pjm pjm
14.

#13 en tot cas, l'imatge qu'utilizan ende representar Libertat uèi lo dia existis pas mei ; jo èi tornat ma carta en 2011, ce'm credi, hart d'aqueras elucubracions dens lo vueit e deus deliris shens reflexion ni respècte du tribalh hèit e de las decisions presas. 
hèi 8 ans, doncs. e me vedi en fòto uèi lo jorn end'illustrar l'actualitat (sic) de Libertat (sicsic) ! n'es pas tant grèu, mès me demandi si dens Jornalet tot es tractat damb autant de seriós...

  • 7
  • 8

Escriu un comentari sus aqueste article