Bandièra01 1180x150: Comuna de Tolosa

Actualitats

Andalosia: los mètges refusan d’identificar los immigrants irregulars

Lo pache del Partit Popular e Ciudadans amb l’ultradrecha de Vox impausa que los mètges identifiquen los immigrants “illegals” per que pòscan èsser enseguits e expulsats

Espital Virgen del Rocío a Sevilha
Espital Virgen del Rocío a Sevilha | Frobles
Los mètges andaloses identificaràn pas los migrants diches illegals per que pòscan èsser enseguits e expulsats. Atal o a anonciat lo Conselh dels Collègis de Mètges d’Andalosia en reaccion a l’iniciativa impausada per l’ultradrecha dins lo pache que menarà la drecha al govèrn regional. “Nosautres, coma mètges, devèm aculhir los pacients sens qu’impòrte se son d’immigrants o non”, çò a dich Emilio García de la Torre, president del Conselh. “Nosautres identificarem pas ni farem res contra cap de persona a causa de la color de sa pèl o de son apertenéncia politica”, çò a precisat segon Redacción Médica.
 
Lo govèrn regional d’Andalosia se constituirà après un acòrdi entre los dos partits drechistas (PP e Ciudadanos) amb l’ultradrechista Vox, qu’a reüssit a impausar qualques unas de sas proposicions, coma que los mètges identifiquen los immigrants “illegals” per que pòscan èsser perseguits e expulsats. La proposicion de Vox acceptada pels autres partits demanda als mètges “de collaborar amb la polícia a l’identificacion d’immigrants illegals per que pòscan èsser expulsats” e mençona especificament lo Conselh dels Collègis de Mètges d’Andalosia que l’acusa d’aparar l’immigracion irregulara; per tant, segon lo partit d’extrèma drecha Vox, “possedís la documentacion que cal per la percaça de 52 000 immigrants illegals mas la parteja pas amb la polícia”. Pasmens, García de la Torre remembra que se consagrarà solament “als afars medicals e a melhorar la santat dins la mesura de çò possible”.
 
A l’ora d’ara, lo Conselh dels Collègis de Mètges d’Andalosia garentís los suènhs medicals a las personas immigrantas en situacion irregulara e sens ressorsas en lor permetent d’accedir al sistèma public de santat d’Andalosia. D’efièch, en 2017 aculhiguèt 47 445 personas migrantas en aquelas condicions.
 
 
 






abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Bernatmm Tarba
1.

" Deure i Glòria d'Hipòcrates"
Eths fascistes e neofascistes, patologicament, se cresen totpoderosis. Que tòrnen a inventar eth monde ara mesura de cada ua deras suas pulsions deth moment.
Eths metges arresponen dignament, damb eth simple exercici d'ua mes antiga lei umana.
Tant Umana !

  • 8
  • 1

Escriu un comentari sus aqueste article