Bandièra01 1180x150: Comuna de Tolosa

Actualitats

Human Rights Watch denóncia l’impunitat de la polícia espanhòla en Catalonha

Lo rapòrt de l’associacion de defensa dels dreches umans critica tanben la lei d’asil de França e lo racisme del govèrn d’Itàlia

Human Rights Watch (HRW) planh que cap de policièr espanhòl “siá estat condemnat per l’usatge excessiu de la fòrça”, durant la repression del referendum d’independéncia de Catalonha e Aran lo 1r d’octòbre de 2017. Dins son rapòrt sus l’estat dels dreches umans dins lo Mond, l’observatòri dels dreches umans soslinha la violéncia de l’estat espanhòl contra l’independentisme. Aquel rapòrt explica qu’en març de 2018 “vint e cinc caps independentistas foguèron enseguits per divèrses delictes qu’anavan de la rebellion al malversament de fonzes”.
 
Durant la presentacion publica del rapòrt, lo director general d’HRW soslinhèt son constat de “l’usatge de la fòrça excessiu per la polícia e de l’abséncia de responsa judiciària”. En d’autres mots, tornèt dire que s’èra “produch un abús sens que degun foguèsse condemnat”.
 
Aquel rapòrt recòrda tanben las persecucions contra la libertat d’expression en mençonant los cases dels cantadors de rap Valtònyc e Pablo Hasel, e lo cas de Casandra Vera condemnada per una publicacion sus Twitter.
 
HRW soslinha pereu la situacion dels dreches umans d’immigrants e refugiats arribats d’Africa en Espanha l’an passat e l’aument de las protèstas sus la violéncia de genre en seguida de cèrtas senténcias judiciàrias masclistas.
 
 
França: una lei d’asil “lacunària”
 
Quant a l’estat francés, lo rapòrt de Human Rights Watch critica la lei sus l’asil e l’immigracion, que qualifica de “lacunària”, e senhala las detencions d’enfants migrants. Tanben soslinha que las condicions de vida dels migrants e dels demandaires d’asil dins la region de Calais demòran sordidas e que la polícia contunha d’i secutar los trabalhadors umanitaris.
 
En mai d’aquò, en 2017 a aumentat d’un 15% lo nombre d’agression fisicas omofòbas, d’un 69% las antisemitas e d’un 8% las agressions islamofòbas.
 
HRW parteja amb l’ÒNU son chepic per la lei antiterrorista de 2017 qu’ofrís pas pro de garentidas per las personas sospechadas de terrorisme.
 
Tanben se critica la nòva lei sus las violéncias masclistas, qu’erigís en infraccion lo secutament per carrièras e dona als jutges lo poder de decidir s’un abús sexual amb un enfant de mens de 15 ans es un viòl o non.
 
 
Racisme en Itàlia
 
Quant a Itàlia, lo rapòrt deplora sustot “lo racisme e la xenofobia” de la coalicion del govèrn italian, critica las mesuras entrepresas per empachar l’arribada de nòus migrants e denóncia la persecucion que se fa de las organizacions umanitàrias del temps que se fisa los salvaments en Mediterranèa als gardacòstas de Libia. Mençona tanben d’episòdis de violéncia racista e la persecucion en massa dels ròms.
 
En mai d’aquò, remembra que lo Comitat de las Nacions Unidas contra la tortura recomanda que la definicion d’aquesta introducha dins lo drech intèrne d’Itàlia en 2017 siá confòrma a la del drech internacional.
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
3.

#1 Es çò qu'anavi dire! Los emplecs de policièrs son d'emplècs amb de futur dins nòstras democracias.

  • 3
  • 0
francesc palma
2.

Visca Human Raightch Watch HEW. Urrà !

  • 3
  • 0
Enric Mala Tèsta
1.

Human Rights Watch (HRW) pòt venir far un torn de l'autra man dels Pirenèus : serà pas decebut tanpauc !

  • 8
  • 0

Escriu un comentari sus aqueste article