La dobertura de la sason novèla de Superliga s’acèrca. Serà pel dijòus 31 de genièr amb un rescontre que veirà los campions de 2018 Wigan anar desfisar Saint Helens. Lo divendres 1r de febrièr, los Dragons Catalans jogaràn a Castleford.

Dètz ensages a Brutus
 
Aqueste divendres 18 de ser, a Brutus, los Dragons Catalans rescontravan una formacion dels melhors jogaires d’Elèit 1: lo XIII del President.
 
Los Sang e Aur utilizèron 22 jogaires alara que l’entraïnaire Cologni s’èra vist las pèiras per remosar 17 jogaires amb un fum de cambiaments improvisats per de rasons divèrsas (nafradura, empachas de mestièr, romegadís dels clubs…).
 
Los Sang e Aur faguèron la diferéncia dins lo primièr temps (26-6) per s’impausar fin finala 38-14 (sèt ensages pels locals contra 3 per la seleccion). Sam Tomkins es en forma, foguèt implicat dins quatre ensages catalans e passèt cinc transformacions. Lo papó David Mead, plaçat a l’ala, marquèt tres ensages. Per sa part, lo pilar Rémi Casty serà tornarmai lo capitani dels Dragons per la sason novèla.
 
Novèla partida amicala pels Dragons aqueste divendres 25 (19h30) , tornarmai a Brutus, contra lo Tolosa Olimpic, qu’entamenarà lo Championship tornarmai a Brutus, contra lo Tolosa Olimpic quinze jorns mai tard.
 
Dins los corredors, s’aprenguèt que la divergéncia financièra amb la federacion anglesa per assegurar la preséncia catalana en Cup seriá sul camin d’una solucion.
 
 
Elèit 1: una jornada esbocinada
 
La partida Dragons-XIII del President a cambavirat lo calendièr de l’Elèit 1. Aqueste dimenge, Albi recebiá Tolosa (en partida… avançada) e, granda suspresa, los vesitaires s’impausan, e largament per lor primièra victòria de la sason: 34-8! Aquesta fin de setmana, se jogaràn: Lesinhan-Albi, Palau-St Gaudenç e Avinhon-Dragonets. Lo dèrbi Limós-Carcassona es remandat al 17 de febrièr. Va èsser complicat de comprene lo classament e de seguir son evolucion: se desvèla atal un art segur de faire complicat! Una gata a de mal d’i tornar trapar sos gatons!
 
 
Elèit 2: Baó mai que jamai en cap de fila
 
En Elèit 2, s’entamenan las partidas retorn. Lo primièr, Baó, es anat ganhar cò del darrièr Selon: 54-10. Son segond, lo campion Vilagalhenc-Argon s’impausa en riba de Ròse, a Lion: 30-14. Vilanòva de Menerbés s’envòla en fin de partida (26-8) dins lo dèrbi fàcia a Ferrals de las Corbièras.
 
 
Copa: Trentèls reçauprà Carcassona
 
Al sèti de la Federacion, aqueste dissabte, se tirèron los 8ns de la Copa Lòrd-Derby, que se debanaràn la dimenjada dels 9 e 10 de març. Trentèls (Nacionala 1) reçauprà Carcassona. Doas partidas opausaràn d’esquipas d’Elèit 2: Vilagalhenc-Argon contra Entraigas e Lion contra Carpentràs. Doas partidas veiràn de formacions d’Elèit 1 se desplaçar cò de clubs d’Elèit 2: Lesinhan a Vilafranca de Roergue e novèl dèrbi per Palau: aprèp lo Barcarés, Pià.
 
Tres partidas entre esquipas d’Elèit 1 seràn tanben al programa: St Gaudenç-Dragonets, Albi-Vilanòva e Tolosa-Limós.
 
 
XIII a la television
 
Una partida de Superliga se debanarà ara lo dijòus. BeInSport la deuriá retransmetre regularament. Per contra, prioritat al fotbòl lo divendres: la partida retransmesa serà en diferit. La cadena contunharà de seguir las partidas dels Dragons a Perpinhan, los dissabtes en fin de vèspre.
 
A comptar de la debuta de març, represa de las retransmissions dels rescontres d’NRL. L’actualitat rugbistica contunharà d’èsser seguida dins lo magazine Rugby-Pack, dedicat al XIII e al XV. 2019, annada clau: la cadena deu tornar signar un contracte novèl pels dreits de difusion de XIII l’an que ven.
 
 
 
 
Alan Roch