Bandièra01 1180x150: Comuna de Tolosa

Actualitats

França acusa Itàlia d’ingeréncias e crida son ambaissador a de consultacions

La crisi esclata après qualques setmanas de tensions sus mai d’un afar dont las politicas migratòrias e lo sosten italian als Gilets Jaunes

Lo ministre francés dels afars estrangièrs, Jean-Yves Le Drian
Lo ministre francés dels afars estrangièrs, Jean-Yves Le Drian | France Diplomatie
Crisi diplomatica entre los estats francés e italian. París a cridat son ambaissador a Roma per “de consultacions”. Segon lo ministre francés dels afars estrangièrs, aquò s’es fach après una tièra de “declaracions otrancièras” e “d’atacas sens fondament” e sens “precedent” dels responsables del govèrn italian. “Las darrièras ingeréncias constituisson una provocacion suplementària e inacceptabla”, çò a precisat lo pòrtavotz del ministèri en apondent que “la campanha per las eleccions europèas pòt pas justificar la manca de respècte de cada pòble o de sa democracia”.
 
Lo Quai d’Orsay repròcha als dirigents italians plusors provocacions qu’an menat a aquesta situacion “inedita dempuèi la Segonda Guèrra Mondiala”, dont un rescontre entre lo ministre italian Luigi Di Maio e de Gilets Jaunes. França es tanben irritada per èsser acusada de “neocolonialisme en Africa” e d’empaurir tant lo continent que las populacions ne devon migrar.
 
La crisi esclata après qualques setmanas de tensions sus divèrses afars: las migracions e los contraròtles frontalièrs amb los nombroses blocatges de la polícia francesa a Ventemilha, lo sosten del govèrn italian als Gilets Jaunes, l’extradicion de Cesare Battisti qu’Itàlia lo considèra coma un terrorista mas que França aculhiguèt coma un refugiat, la gestion de la crisi en Libia que França i voliá d’eleccions en decembre mentre qu’Itàlia crei que cal esperar, la gestion de la Linha de Nauta Velocitat entre Lion e Turin, qu’una part del govèrn italian es contra los trabalhs, e la polemica provocada pel Movement 5 Estelas, un dels dos partits del govèrn italian, qu’acusa França d’aver pas descolonizat de tot en tot Africa. Sus aquel darrièr subjècte, Itàlia demanda que França meta fin al franc FCA, çò es la moneda de 14 estats africants, dont majoritàriament d’èx-colònias francesas. Segon Luigi Di Maio, aquela devisa es un exemple d’un “neocolonialisme” qu’esplecha las ressorsas africana e obliga la populacion de migrar.

 
 
 
 








abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
5.

Visca los Gecs Jaunes e sa defensa dels trabalhadors. E visca "Cinc Esteles"que son pas faches coma altres del govern italian. Macrona es una titelha dels banquier privats nomenats Alí Babà e sos quaranta laires.

  • 3
  • 1
ASCOLI/ Gorizia
4.

#2 Ieu, pensi que se sona una policia de la pensada, que ès a botar en plaça LAREM.
Ajustarai una sola causa : los occitanistas an de faire lo balanç de la politica macroniana de cara a las lengas dichas minoritarias e la politica de l'Italia sul sicut.
Demandètz als occitans de las Valadas se volrian "beneficiar" del mesprez dels francimans e de l'estat francés per lor lenga, e parli pas dels friulans, venets, sud-tirolers, sards, catalans de l'Alguer, sicilians, eca...

  • 4
  • 1
Enric Mala Tèsta
3.

#2 S'apelava la dictatura, e consistissiá a te dictar tot acte e tota pensada. Per i tornar sentir lo sens plan chucós d'aquel mot oblidat, cal tornar legir un pauc atentivament 1984 d'Orwell, oBrave New Wordl de Huxley, o mirar, pel plaser, V for Vendetta de Wachowski & Watchowski (fraires o sòrres segon lo periòdi considerat).

La dictatura que ne patissèm a l'ora d'ara posa sas fondamentas dins la doctrina del Milton Friedman, de l'escòla de Chicago (o se mai t'agrada, chie, caga…)

  • 6
  • 1
Pitaluga
2.

Es plan susceptible lo duc de Bretanha. Es vertat que, se la colonizacion de Bretanha lo geina pas, cossí se fariá de lagui pel colonialisme francés en Africa? E se pensas pas coma el, es que siás un populista.
Avètz remarcat que se pòt pas pus res dire dins lo reiaume de França: quand siás pas un populista es que fas de complotisme, quand siás pas un passeista siás un nèci, quand criticas la somission de la politica al mercat es que comprenes pas res a l'economia, quand dises que pòdes pas arribar a la fin del mes es que siás pas capable de traversar la carrièra... La tòca es d'interdire de pensar. Cossí se sonava aquò del temps que se podiá parlar clar e occitan?

  • 10
  • 0
Papioli
1.

Au nom de la neutralitat jornalistica, Jornalet vai aribar a tombar dins la collaboracion emben Macron.

  • 5
  • 5

Escriu un comentari sus aqueste article