D’expèrts de l’ÒNU an denonciat de restriccions grèvas als dreches dels manifestants Gilets Jaunes. “Lo drech de manifestar en França es estat restrench de manièra desproporcionada” al temps de las manifestacions dels Gilets Jaunes, e “las autoritats deurián repensar lors politicas en matèria de mantenement de l’òrdre per garentir l’exercici de las libertats”, çò afirman.
 
Los expèrts an comptabilizat mai de 1700 personas nafradas grèvas dempuèi lo començament de las protèstas d’aquel movement, per las dichas armas non letalas. En mai d’aquò, senhalan que lo nombre de detencions e de confiscacion de bens dels manifestants es “naut”. Dins aquel sens afirman que “garentir l’òrdre public e la seguretat implica lo besonh de respectar e de protegir los que protèstan d’un biais pacific dins una manifestacion”.
 
E mai los expèrts deploran que siá “inquietant de veire malgrat de setmanas de recampaments, las restriccions e las tacticas per contrarotlar los manifestants e l’usatge de la fòrça”.
 
Aqueles expèrts son lo president-raportaire del Grop de Trabalh sus las Detencions Arbitràrias, Seong-Phil Hong; lo raportaire especial de la situacion dels defensors dels dreches umans, Michel Forst, e lo raportaire especial dels dreches de las liuras reünion e associacion, Clément Nyaletsossi Voule.