Bandièra01 1180x150: Comuna de Tolosa

Actualitats

Rugbi de XIII: los Pols cantan "caracacac" sul tet del Mond

Un còp de mai, aqueste dimenge de ser a Wigan èra question de supremacia tretzista mondiala entre Anglatèrra e Austràlia

Los aborigèns (34-14) ganhèron contra los maòris a Melbourne
Los aborigèns (34-14) ganhèron contra los maòris a Melbourne
Lo còp de capèl de Brett Morris fa la diferéncia
 
L’estadi de Wigan èra comol per aquel afrontament entre los venceires 2018 de la Superliga, Wigan, e los campions de l’NRL, los Polets (Roosters) de Sydney.
 
Tres ensages del centre australian Brett Morris balhavan lèu-lèu un avantatge bèl als vesitaires 14-0 que los angleses capitèron pas de remontar, un còp dintrats dins la partida. Los Polets s’empòrtan lo trofèu de l’autra part de la planeta amb una victòria significativa sus la marca de 20 a 8.
 
 
Elèit 1: quand la palma ven confèti!
 
Èra tanben question de supremacia aqueste dimenge a l’Agulha amb Lo Dèrbi: Limós recebiá lo vesin de la prefectura, Carcassona. Lo cèl èra blau, lo vent bufava just çò que cal. Las tribunas èran plan garnidas. Carcassona començava melhor la partida mas marcava gaire. A la pausa, los locals menavan 14-6. Dins lo segond temps, Carcassona marcava d’entrada, la partida s’equilibrava, mas dins lo darrièr quart d’ora los Canaris, al jòc mai levat e mai diversificat, passavan tres còps la rega per ganhar fin finala 31-14.
 
Per la mesa a jorn del calendièr, dissabte, St Estève-XIII Catalan s’èra vist las pèiras per batre Albi 42-24. Dimenge, Tolosa confirmava que Palau se trapava a l’arrèst: victòria tolosana 35-26. Atal, lo campion Avinhon se trapa a la darrièra plaça del classament!
 
Per la jornada venenta, un novèl dèrbi es al programa dimenge a Domèc: Carcassona-FC Lesinhan (a 4 oras del vèspre, aprèp un repais-caçolet a miègjorn jol tibanèl de l’estadi). Al programa tanben d’aquesta primièra jornada de las partidas retorn: Limós-Avinhon; Albi-Dragonets; Palau-Tolosa; Vilanòva-St Gaudenç.
 
 
Championship: Tolosa lança sa sason
 
Aqueste dissabte, a Blanhac, lo Tolosa Olimpic a signat sa primièra victòria de la sason de Championship fàcia a Rochdale, dominat 42-12. Aqueste dissabte 23, los occitans aniràn desfisar los Leons de Swinton.
 
 
Los Indigènas mai fòrts que los maòris
 
A Melbourne, la formacion, compausada majoritàriament d’aborigèns d’Austràlia, s’es mostrada mai organizada e mai collectiva que los maòris neozelandeses per ganhar 34-14.
 
 
Superliga: lo retorn del filh prodig
 
L’escapada de Foad Yaha del costat del XV e d’Agen aurà pas despassat los 6 meses. L’alièr a reïntegrat l’efectiu dels Dragons Catalans qu’aqueste dijòus de sèr jogaràn a Wakefield.
 
 
 
 
Alan Roch
 
 
 




abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Es necessari lo rubbi per haver homes forts per anar a las manis en primiera fila, que amb aquestes non s'atreveissen los gendarmas.

  • 1
  • 0

Escriu un comentari sus aqueste article