Malgrat que la màger part del mond pòscan pensar qu’oblidar un fach pòt èsser plan mai aisit que se’n remembrar un autre, es pas aital. D’efièch, desmembrar un fach passat entraïna fòrça mai d’esfòrç cerebral que se’n recordar, çò an descobèrt una còla de cercaires de l’Universitat de Tèxas, a Austin. La descobèrta venguèt amb una tecnologia sonada neuroimaging.
 
La tròba que se ramentar entraïna mens d’esfòrç mental per un èsser uman que desmembrar depend totjorn de l’atencion de la persona. Una experimentacion que durèt d’annadas balhèt coma resulta que l’atencion es essenciala quand volèm oblidar un fach o se’n recordar. E remembrar còsta mens d’esfòrç que desmembrar un fach pel cervèl uman.
 
“Sovent volèm desmembrar de faches traumatics coma responsa, çò diguèt Jarrod Lewis-Peacock, lo psicològ de l’universitat texana d’Austin que dirigiguèt aquel estudi. Avèm la facultat de poder desmembrar o se remembrar un fach amb la volontat. Çò que cal far es trapar cossí fonciona lo cervèl quand volèm far una causa o l’autra. La memòria umana es pas estatica. Es dinamica e càmbia cada jorn pendent lo sòm”.
 
Fins a uèi, d’autras investigacions avián analisat l’activitat cerebrala segon son estructura, çò es en tot estudiar lo cortèx o l’ipocamp. Los darrièrs estudis e lo de l’Universitat d’Austin an analisat, totun, la percepcion que i a dins los desparièrs airals del cervèl, çò es lo cortèx temporal central e l’activitat de las estimulacions visualas complèxas. E la resulta es estonanta.
 
Amb la tecnologia nomenada neuroimaging se pòt ara espepissar prigondament l’activitat cerebrala, un fach qu’abans èra impossible. Los cercaires poguèron mostrar un grop de scènas mas tanben de personas a diferents adultes. Ne caliá desmembrar qualques unas e se remembrar d’autras. Que foguèt de melhor far?
 
 
Mens d’esfòrç cerebral quand nos recordam
 
La resulta finala d’aquel estudi confirmèt que los èssers umans avèm la capacitat de contrarotlar çò que volèm oblidar e a l’encòp çò que nos en volèm recordar. E desmembrar necessitava de nivèls moderats d’activitat cerebrala mentre que se remembrar implicava pas tanta activitat. Aital, los airals sensorials e perceptuals del cervèl mostrèron una activitat plan mai nauta quand caliá oblidar un fach.
 
“Es de besonh un nivèl d’activitat moderat quand volèm desmembrar un fach, çò confirmèt Tracy Wang, de la còla d’Austin que realizèt aquel estudi. Se l’esfòrç es tròp fòrt demòra dins la memòria, e se l’esfòrç es tròp flac se pòt pas cambiar. La volontat d’oblidar o de se recordar d’un fach es çò qu’activa la memòria umana, e es quand i a mai d’esfòrç que podèm desmembrar un fach”.
 
Aital, la còla de cercaires confirmèron que l’idèa pro espandida entre totes que desmembrar còsta pas res es ara pas pus valida. Segon aqueles cercaires, se remembrar còsta plan mens qu’oblidar pr’amor que cal utilizar la volontat per doblidar un fach, çò qu’entraïna mai d’esfòrç cerebral, mai d’esfòrç mental.
 
Totun, pendent l’experimentacion, los cercaires tanben descobriguèron qu’es plan mai aisit de desmembrar una scèna o un païsatge que non la cara d’una persona pr’amor qu’aquesta balha fòrça mai d’informacion emocionala al cervèl uman; e doncas es pus malaisit de l’oblidar. (Legissètz la seguida)




 

---

Aqueste article es  publicat dins Sapiéncia, la revista occitana de divulgacion scientifica, amb la quala Jornalet a un acòrdi de cooperacion. Podètz legir l'article entièr aicí.