Après los 41 membres del senat francés, ara es la region qu’a pres lo nom d’Occitània que demanda oficialament la liberacion dels presonièrs politics catalans. Lo Conselh Regional d’aquela collectivitat territoriala a publicat una resolucion que critica la repression de l’estat espanhòl contra los independentistas catalans. Lo tèxt foguèt aprovat per 94 vòtes en favor e 48 contra.
 
La region s’exprimís naut e clar sus la situacion: exigís la liberacion dels presonièrs, lo retorn dels exiliats, rend omenatge a la non-violéncia catalana, demanda una solucion politica negociada amb una mediacion europèa... Dins aquel sens, soslinha lo besonh de respècte dels dreches fondamentals e remembra que la convocacion d’un referendum foguèt despenalizada en 2005 pel quite Congrès dels Deputats espanhòl. E mai met en question las acusacions de rebellion e de malversacion, e descredita las acusacions contra los independentistas perseguits en remarcant de contradiccions dins los arguments.
 
Enfin, los conselhièrs regionals demandan la mesa en òbra d’un “mecanisme de mediacion a nivèl europèu per tal de desgatjar los mejans e las vias per restaurar una vida plenament democratica en Catalonha”.
 
Mentretant, en Espanha, lo Conselh Electoral a enebit als mèdias publics las paraulas “presonièrs politics” e “exili”, e a obligat de levar los ribans jaunes de totas las bastissas publicas e escòlas.
 
 

La Région #Occitanie s’exprime haut et clair sur la situation en #Catalogne :
libération des prisonniers politiques, retour des exilés, hommage à la non violence catalane, appel à une solution politique négociée, demande de médiation européenne... Tout y est !#PresosPoliticospic.twitter.com/lj5UxbOMPa

— Gérard Onesta (@OnestaGerard) 28 de març de 2019