Consternacion en Aran après lo decès de Merche Delaurens Deò a 63 ans, d’una crisi cardiaca. Delaurens foguèt conselhièra de la cultura, de l’educacion, de la santat e benèsser del Conselh General d’Aran entre 1999 e 2007. Dijòus passat, del temps que menava sa veitura près d’Es Bòrdes, remarquèt que se trobava pas plan, s’arrestèt e telefonèt a l’assisténcia medicala. Sul pic, un elicoptèr la menèt a l’espital de Vielha. Malastrosament, quand arribèt èra ja defuntada.
 
Los partits politics d’Aran an arrestat la campanha electorala aquesta dimenjada, e mai dimenge que ven lo país de cap de Garona aja de viure una tripla jornada electorala ont los ciutadans elegiràn lo Conselh General, los conselhs municipals e lo Parlament Europèu.
 
Lo sindic aranés, Carlos Barrera, soslinha dins un comunicat del Conselh General d’Aran “es ueit ans d’exercici des sues responsabilitats coma conselhèra generau” que “sigueren d’ua exemplar dedicacion, tenacitat e esfòrç entà assolidar Aran coma un veritable país”.
 
Delaurens participèt en 2005 a la manifestacion Anem Òc per la lenga occitana que se tenguèt a Carcassona, en representacion del govèrn aranés (fòto).