Bandièra01 1180x150: Comuna de Tolosa

Actualitats

crotz-tolosaCreated with Sketch.ProvençaProvençaVencenc

Canas 2019: lo corean Bong Joon-Ho a emportat la Palma d'Aur

La 72a edicion del festenal de cinèma de Canas s’es clavada amb una bona mòstra de cinèma, e una tièra de proposicions fòrça variadas

Del 14 al 25 de mai s'es debanada a Canas (Vencenc) la 72a edicion del Festenal Internacional de Cinèma. Es l’eveniment pus important del Mond pertocant lo cinèma, e doncas, un eveniment màger d’Occitània. Los jornalistas Zep Armentano e Adriana Díaz i son anats qualques jorns e an raportat l’eveniment sus plaça per Jornalet. Vejatz la galariá de fòtos.


Lo filme Gisaengchung/Parasite, del realizaire corean Bong Joon-Ho, a ganhat la Palma d'Aur de la 72a edicion del festenal internacional de cinèma de Canas (Vencenc). S'agís d'un drama orrific sus las relacions umanas e las diferéncias socialas gràcias a las simbiòsis, e sus la relacion parasitària d'una familha rica e d’una paura que lors enfants venon d'amics. Amb aquel prèmi, Bong ven lo primièr corean a ganhar lo prestigiós prèmi del festenal provençal de cinèma.
 
Pasmens, ongan lo festenal es estat mai hollywoodian que jamai amb una nombrosa preséncia de representants estatsunidencs interessats pel festenal. Totun, i es passat, sens cap de prèmi, Quentin Tarantino que presentava son filme Once upon a time... in Hollywood, un metratge qu'a jonch dins un meteis filme Brad Pitt e Leonardo di Caprio, los dos actors pus cobejats del cinèma estatsunidenc dels darrièrs 20 ans.
 
De son caire, Sylvester Stallone, que profechava de l'eveniment per presentar la remasterizacion de Rambo 1 e anonciar Rambo 5, presentèt lo Grand Prèmi de la Jurada, que l'a emportat lo filme Atlantique, de la realizaira francosenegalesa Mati Diop, la primièra femna negra qu'a participat a Canas. Son filme explica una istòria d'amor sus la còsta senegalesa de dos joves que pantaissan d’un Mond melhor.
 
En tresena posicion, dins lo Prèmi de la Jurada, son estats laureats dos filmes, Bacurau dels realizaires brasilièrs Kleber Mendonça Filho e Juliano Dornelles, e lo filme Les Miserables del realizaire francomalian Ladj Ly. Lo primièr filme es una granda reflexion sus la realitat que se viu en Brasil per mejan d'un thriller de ficcion d'un avenir òrre que se poiriá passar lèu. L'autre es un longmetratge policièr rodat amb vertat e vam dins las banlègas d'una granda vila.
 
Lo prèmi de la melhora actritz femenina l'a emportat Emily Beecham pel filme Little Joe de la realizaira austriana Jessica Hausmer. D'aquela passa, Antonio Banderas a ganhat lo prèmi del melhor actor pel filme autobiografic de Pedro Almodóvar, Dolor y Gloria.
 
La jurada es convenguda que lo prèmi del melhor realizaire l’empòrten los fraires Jean-Pierre e Luc Dardenne. Los realizaires bèlgas an presentat lo filme Le jeune Ahmed.
 
Lo guierdon del melhor escenari es estat per la francesa Céline Sciamma per Portrait de la jeune fille en feu.
 
La recompensa del melhor cortmetratge es estada per The Distance Between Us del grèc Vasilis Kekatos.
 
Enfin, la Camèra d'Aur es anada al filme Nuestras Madres del guatemaltèc César Díaz. Aquel prèmi onora lo primièr filme presentat dins quina seccion que siá del festenal.

 
 
 
 
 

pa


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

pjm tròlla !
4.

#3 damb plaser, mon òme ! esperi encara l'amassada de redactors, ende debàter de la linha editoriala e deu foncionament...

#2 d'escríver me'n hartèri pas, nani ! sonqu'esperi encara l'amassada de redactors, ende debàter de la linha editoriala e deu foncionament...
comprendi pas tròp l'idèa de troll, a despart d'éster aplicada a tot pip-pap tanlèu que ne som pas d'acòrdis. volossin pas de trolling, los dirigents de Jornalet aurén dejà barrats los comentaris, supausi...

  • 0
  • 0
Terric Lausa Quilhan
3.

#1
Al trabalh d’escritura, valent revoltat!

  • 6
  • 2
Jana Gèssa (Aran)
2.

#1 Era notícia sus es eleccions la traparàs un shinhau mès tà baish, ena edicion de divendres. Aguesta notícia ei sus eth hestivau de Canes. Per cèrt, se lieges er article veiràs que son ues eleccions molt importantes entà Aran.

Se non rebrembi mau, tu escrivies articles tà Jornalet enquia que te’n hartères e ara hès de tròl professionau enes comentaris. Semble que mon se te pòt préner guaire seriosaments

  • 8
  • 3
pjm pjm
1.

n'i a pas eleccions uèi ?

  • 5
  • 10

Escriu un comentari sus aqueste article