Bandièra01 1180x150: Comuna de Tolosa

Actualitats

Lo diccionari de Simin Palai que va estar reeditat

La navèra edicion que pareisherà en dus volums, dab un prefaci lingüistic d’Eric Gonzales e tanben ua introduccion istorica perpausada per Sèrgi Javaloyès

Que se’n parlava despuish quauque temps, qu’ei adara oficiau: lo diccionari de Simin Palai que va estar reeditat. Que son las edicions Reclams qui ac haràn, après un tribalh aviat 5 ans a , e qui ei luenh d’estar acabat. E que òc, ne cau pas créder, ne sufeish pas de prémer suu boton de l’imprimidera entà tornar editar un diccionari, b’ei long lo camin! 

 

Qu’a calut prumèr que gahèssin los drets deu CNRS, puish l’autorizacion deus drettenents, abans de s’i poder gahar per de bon: picar, corregir, adobar, etc. 

 

La navèra edicion que pareisherà en dus volums, dab un prefaci lingüistic d’Eric Gonzales e tanben ua introduccion istorica deu Palai, perpausada per Sèrgi Javaloyès e Maurici Romieu. Qu’an conservat la grafia febusiana, mes la version numerica, qui sortirà tanben, que hornirà las entradas en grafia classica, entà ahiscar los neolocutors a emparà’s d’ua òbra màger per la lenga gascona. 

 

E si  aviar un tau tribalh, a l’òra quan s’espandeish tostemps mei lo numeric, e poderé semblar hòu, Sèrgi Javaloyès que bremba au micro de Ràdio País aqueth projècte que correspon totun a ua demanda sociau (la version istorica deu Palai que’s pòt véner dinc a 1000 euròs sus Internet!), en tot ajustar qu’i cab tanben un simbòl hòrt: la reconciliacion deus patacaires de la grafia. 

 

La navèra edicion que serà mei a portada: entre 180 e 200 èuros, segon la version. 

 

Que sortirà en fin d’annada, e que i aurà d’ací quauques mes ua soscripcion en linha entà’u reservar. Probable lo pair Nadau que se’n harà seguir quauques exemplars en la banastra entà’us depausar au pè de l’avet. Un present deus bons. E dab tanben la sortida anonciada deu navèth gran diccionari de las edicions Per Noste, los gascons n’averàn pas nada excusa tà non pas apréner la lor lenga! 

 

Aquí que podetz escotar l’entervista de Sèrgi Javaloyès, au micro de Ràdio País lo 4 de junh passat (que comença a 30 minutas).


 
 
 
 Ràdio País
 
 
 

 
 
 
Aqueste article es possible gràcias a un acòrdi de cooperacion entre Jornalet e Ràdio País.
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Patrick DREAN
1.

Osca ! Osca ! La calerà har viure totun, e anar pescar hens sas pajinas de mots entà diser nostre monde d'uei.

  • 0
  • 0

Escriu un comentari sus aqueste article