Los collegians d’Albi poiràn pas contunhar d’estudiar l’occitan al licèu. Lo collègi public Bellevue d’aquela vila foguèt un dels primièrs de l’acadèmia de Tolosa a introduire una seccion bilingua en 1995 per seguir lo percors de l’escòla mairala. Ara, los collegians se tròban fàcia al fach que l’occitan s’arrèsta a las pòrtas del licèu, ont  la sola possiblitat que tenon es un cors d’occitan d’una ora per setmana d’ensenhament opcional, sens distincion entre los escolans que començan e los qu’an ja seguit un percors bilingüe dempuèi l’escòla mairala.
 
Segon un comunicat de l’Associacion Òc-Bi del departament de Tarn, fòrça escolans bilingües de 3a o de 2a desiran de contunhar l’occitan dins la ciutat escolara. Eles devon aver drech d’aquerir lo nivèl B1-B2 del Quadre Europèu Comun de Referéncia per las Lengas. En mai d’aquò, Òc-Bi remembra la convencion-quadre pel desvolopament e per l’estructuracion de l’ensenhament de l’occitan signada en genièr de 2017 per la Region, lo Rectorat e l’Estat davant las camèras de France 3 e l’inspector general encargat de las lengas dichas regionalas. Recòrdan tanben la paraula de la rectritz d’aquela circonscripcion escolara: lo 13 de febrièr de 2019, s’engatgèt d’efièch sus la securizacion dels percorses bilingües.
 
Ça que la, lo rectorat de Tolosa a pas respondut a cap de las onze demandas per una seccion bilingua francés-occitan. A quitament ignorat la demanda adreiçada lo 19 d’abril passsat que recensava las autras onze demandas.
 
Las revendicacions d’Òc-Bi son pas brica desmesuradas. Demandan que s’establisca pro d’oras per que los escolans pòscan beneficiar d’almens doas oras per setmana dins lo quadre de l’ensenhament bilingüe amb la possibilitat de recampar, se cal, los escolans de 2a e de 1a dins un meteis cors.
 
Òc-Bi es una associacion d’ensenhaires e de parents de l’ensenhament public de las acadèmias de Tolosa e de Bordèu, que trabalha per difusar e metre en plaça l’ensenhament bilingüe per que l’occitan siá present dins lo sistèma public d’educacion.