Bandièra01 1180x150: Comuna de Tolosa

Actualitats

De dobtes e de protèstas per l’acòrdi entre Ucraïna e Russia per far d'eleccions en Donbass e i desvolopar un regim d’autonomia

Lo president ucrainés es acusat d’aver “capitulat” davant Moscòu

| Lo president ucraïnés, Volodimir Zelenski, explica lo pache als mèdias
Ucraïna e l’Organizacion per la Seguretat e la Cooperacion en Euròpa (ÒSCE) an anonciat un nòu acòrdi amb Russia e amb los independentistas de Donbass (Donetzk e Luhansk) per la celebracion d’eleccions localas en aqueles dos territòris de l’èst ucraïnés, contrarotlats per doas republicas autoproclamadas independentas dempuèi 2014 e sostengudas per Moscòu. L’anóncia a provocat de protèstas a Kyiiv contra lo president ucraïnés, Volodimir Zelenski. Ça que la, se dobrís la pòrta a desblocar las convèrsas sus un conflicte que, dempuèi 2014, a causat 13 000 mòrts.
 
L’acòrdi, signat a Minsk (Bielorussia) lo 1r d’octòbre passat, se basa sus la dicha Formula Steinmeier, elaborada en 2016 per lo ministre alemand dels afars estrangièrs d’alara , Frank-Walter Steinmeier. La formula es una varianta simplificada dels Acòrdis de Minsk qu'Ucraïna e Russia avián signats en 2014 e 2015, mas que foguèron pas jamai aplicats.
 
Essencialament, la Formula Steinmeier prevei la tenguda d’eleccions localas en Donbass susvelhadas per l’ÒSCE jos legislacion ucrainesa, la mesa en òbra d’un estatut especial d’autogovèrn per Donetzk e Luhansk, e lo retorn a Ucraïna del contraròtle de sa frontièra orientala —la que marca lo limit de Donbass amb Russia.
 
Las interpretacions qu’aquò compòrta son variadas, mai que mai en çò que tanh a quina serà la sequéncia de la mesa en òbra. Zelenski assegura que las eleccions e l’autonomia intraràn solament en vigor après que las tropas russas auràn abandonat Donbass e qu'Ucraïna aurà recobrat lo contraròtle de la frontièra orientala. Lo president considèra qu'es un pas endavant devèrs la patz e la restauracion del contraròtle ucraïnés de Donbass.
 
Mas lo cap de l’oposicion e èx-president, Petro Poroshenko, l’acusa d’aver consentit que las eleccions localas e l’autonomia —que provisòriament deu intrar en vigor lo jorn del vòte— se debanen sens qu'Ucraïna aja recebut de garentidas realas de recobrar lo contraròtle dels territòris de l’èst, de sòrta que l’acòrdi dobrís la pòrta a permetre que Russia tenga una granda capacitat d’influéncia suls afars intèrnes d’Ucraïna.
 
De centenats de manifestants, que la BBC definís coma de “nacionalistas” ucraïneses, protestèron la quita nuèch del 1r d’octòbre contra l’acòrdi, en lo qualificant de “capitulacion”, mot que tanben l’empleguèt Poroshenko.
 
De son latz, Russia refusa que i aja de tropas regularas sul territòri, e mai i aja de pròvas de la preséncia de milièrs de volontaris russes e de sosten militar rus a las milícias inscrichas a las doas republicas autoproclamadas (la Republica Populara de Donetzk e la Republica Populara de Luhansk).
 
Après l’anóncia de Zelenski, los dirigents de las doas republicas de Donbass an avertit qu'Ucraïna recobrarà pas jamai lo contraròtle de la frontièra, e an dich que lo futur de Donetzk e Luhansk lo decidiràn solament lors abitants.
 
D’autre caire, l’acòrdi prevei lo retirament de las tropas, tant las ucraïnesas coma las independentistas, de las doas localitats situadas al front.
 
Los passes de seguir deuràn èsser discutits dins una reünion que se tendrà dins la setmana avenidoira entre Ucraïna, Russia, Alemanha e França.
 
 
 
 
Aquesta nòva es adaptada de Nationalia amb qui Jornalet ten un acòrdi de cooperacion.
 
 
 
 
abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

Ara que son independents non voldran tornar enrera a una autonomia. Visca lo Dombass liure e independent !

  • 2
  • 0

Escriu un comentari sus aqueste article