Bandièra01 1180x150: Comuna de Tolosa

Actualitats

EnvironamentPoliticaSciéncia
crotz-tolosaCreated with Sketch.GuianaRoergueSantafrican

An expulsat l’Amassada, la ZAD de Sant Victor e Malviu

La nomenada “Comuna liura de l’Amassada” la rasèron tota los buldozèrs e ne demorava pas res en fin de jornada, aqueste dimars 8 d’octòbre

| @Drapeau_rouge1

Dimars 8 d’octòbre, a 5 oras del matin, 150 gendarmas mobils acompanhats de dos blindats expulsèron lo seissantenat de militants del masatge de resisténcia –sonat,  en occitan, “L’Amassada”– contra lo projècte d’installacion d’un transformador gigant per RTE (Ret de Transpòrt d’Electricitat, entrepresa de transpòrt d’electricitat, filiala d’EDF a un 51%).


Fa 5 ans, se constituiguèt a l’entorn d’agricultors, d’elevaires e d’abitants del vilatjòt de Sant Victor e Malviu (Santafrican), l’Amassada, una Zòna A Defendre (ZAD) per s’opausar al projècte d’installacion d’un megatransformador electric e d’un camp de 6,328 ectaras d’eolianas (dont 4 ectaras de “bonas tèrras” pauc clinadas trabalhadas per dos joves agricultors) .
 
Lo projècte, validat per l’estat francés e menat per l’entrepresa RTE, faguèt nàisser fòrça gorgolhs dins lo parçan e fins al quite conselh munipal de Sant Victor, que lo cònsol màger foguèt acusat d’aver presa la decision sens ne parlar als elegits. Çò o expliquèron los militants dins un filme que se pòt agachar aicí:
 

 

Se desvolopèt alara un movement de lucha, que vegèt la construccion d’un ostal comun, “L’Amassada”, que s’i amassèt pauc a pauc a l’entorn tot un masatge d’ecologistas, de militants de la Confederacion Païsana, e d’abitants dels entorns. Al crit de “Pas res nos arrèsta”, en occitan encara, ocupèron la plana ont lo transformador deviá èsser construsit.
 
Mas la “Comuna liura de l’Amassada”, coma la descrivon los zadistas, la rasèron tota los buldozèrs e ne demorava pas res en fin de jornada, aqueste dimars 8 d’octòbre. Lo luòc es ara entièrament barralhat.


 
Ça que la, los opausants al projècte lançan una crida a una novèla protèsta regionala aqueste dissabte 12 d’octòbre a Sant Victor, coma se pòt legir sul sit Internet de l’Amassada.
 
 
 
 
Primaël Montgauzí



 
 
 
   
 
 


abonar los amics de Jornalet
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
1.

Dins los discorses, lo poder ditz que farà quicòm per la planèta.
Dins la practica, tustan sus los que fan quicòm dins aquel sens.
A Bure es parièr. Ensajan de far passar per de violents de mond que vòlon arrestar lo foliá nucleara. Qui a vist los rengs negres de CRS avançar cap al bòsc de Bure crei viure un marit sòmi de sinistra memòria.

Transportar d'electricitat sus de centenats de quilomètres es un grand degalh d'energia. Mas cal justificar las centralas nuclearas, vertat?
E puèi EDF es a far quincanèla e sap pas cossí ne sortir. Pas que Flamanville nos còsta ja 12 miliards d'euros e sem pas segur qu'o poiràn acabar (e fin finala, valdrà mai aital!).
Pagam de milions d'euros a Finlàndia per lo retard de l'EPR qu'EDF ensaja d'i bastir sens capitar d'o far.
Gara lo borson que caldrà ben que nos lo fagan pagar qualque jorn.

Mas quand òm aima, òm compta pas, sustot quand s'agís de l'argent dels autres. E de que aiman? la bomba atomica pardí! Lo nucleari civil servís sustot a apiejar lo nucleari militar. Lo nòstre comic de servici a l'intencion de se lançar dins la guèrra de l'espaci, o cal pas oblidar: o a dich.

  • 8
  • 0

Escriu un comentari sus aqueste article