La Copa de França amb sos 1/8ns de finala èra a l’òrdre del jorn d’aquesta dimenjada de represa. Lo tenent, Carcassona, recebiá Vilanòva sus la pelena de Domèc tre dissabte, amb un temps ivernal: lo freg e una ventòrla de cèrç. Los jaune e negre dintravan dins la partida amb dos ensags dins las cinc primièras minutas, ne rajustèron un a la mièja-orada e concedèron una penalitat sus la còrna: 14-2 a la pausa. Se Vilanòva marcava sus intercepcion tre la represa, los jaune e negre replicavan sul pic, puèi ajustavan tres ensags de mai, e l’ofèrta de doas realizacions sus intercepcion als vesitaires que permetián una larja e confortabla victòria dels Audencs: 38-20.
 
Per sa part, lo Tolosa Olimpic se qualificava aisidament del costat de Lion: 50-6. Los rescontres de dimenge, permeton al pichon Pocet de Nacionala 1 Realmont de contunhar l’aventura en batent Tonens 32 a 10.
 
Los Lops de Vilafranca de Roergue passan en quart per un punt 25-24 fàcia a Cavalhon.
 
Lo derbi catalan vira logicament a l’avantatge dels Dragonets 60-14 contra Baó e Avinhon l’empòrta a Tolosa contra los Broncòs: 36-4.
 
A Limós, èra la primièra sortida de Carnaval e los Molinièrs èran de matin anats demandar l’autorizacion de festejar al jos-prefècte. Lo vèspre, l’esquipa de Limós se trapava fàcia a d’autres Molinièrs del costat de Lesinhan! E vista lor equipa amb d’auséncias en causa de suspensions (tres jogaires marcats per la Comission de disciplina per contestacions de l’arbiter: benlèu las malafachas de la pratica de la china?) e de nafraduras, lo sòrt promés als Limosencs èra de passar jos la mòla de pèira d’una equipa reputada mai solida. E de fait, tre la primièra minuta, lo dobertura Wyn metiá a profit una patanada de Ramage, plaçat a l’arrièr, per anar entre los pals e transformava: 6-0 pels locals. Mas al quart d’ora, lo mesclanha Murcia se jogava de la defensa locala, puèi l’alièr Sardà debordava a la mièja-ora e lo centre Blanch rajustava un tresen ensag a la 35ena. A la suspresa generala, Limós contra lo vent menava 14-6. A la còrna, dins lo canton, Pèire Megre marcava en fòrça e Wyn transformaca. 14-12 pels vesitaires a la pausa. Tre la represa,Wyn se pagava un eslalòm victoriós dins la defensa carnavalenca e transformava: Lesinhan tornava prene l’avantatge 18-14. Pendent mièja-ora, lo jòc s’equilibrava: Limós ramosava totas sas fòrças per defendre, ajudats per la manca d’inspiracion e las aproximacions dels locals, mas vendemiava tanben doas o tres bravas ocasions d’ensag. A 3 minutas del tèrme, l’alièr Sardà acabava per trapar la fendascla dins la muralha verda e blanca per s’anar amorrar entre los pals. Lo pè de Ramage trantolava pas per la transformacion. Demorava als roge e negre de faire virar lo cronomètre e a Lesinhan de faire una ultima fauta de man sul darrièr balon: Limós podiá dançar fecòs 20-18 sus la pelena del Molin.
 
En principi, Lescura serà lo uèiten qualificat pels quarts mas Pià a lançat una procedura davant lo Tribunal Administratiu de Montpelhièr per contestar son exclusion de la competicion per la Federacion; de seguir…
 
Dimenge, represa del campionat amb en cap d’aficha, lo derbi entre los eròis de la dimenjada Limós e los vesins-campions de l’ASCarcassona.
 
Lesinhan ensajarà de sortir de l’espirala de la desfaita del costat de Lescura.
 
Lo cap de fila Pià a una polida carta a jogar a Vilanòva e Avinhon, venceire a l’anar, reçauprà Tolosa.
 
De notar qu’aqueste divendres 11 de genièr, los Dracs catalans presentaràn la sason de Super-Liga a Carcassona: entrainament a l’estadi Domèc (16h-18h), e serada sala del Dòme (a 19 h). La formacion ven d’aprendre l’operacion a un uèlh de lor menaire de jòc Scott Dureau en Australia e se sap pas quora poirà reprene la competicion.
 
 
 
 
Alan Roch