Actualitats
Es nascuda en Quebèc la Convergéncia Nacionala, un “projècte de mobilizacion” per un dialòg entre sobeiranistas
Los promotors de l’iniciativa vòlon que los partits quebequeses arredondiscan los angles per avançar cap a la sobeiranetat. Las formacions politicas o veson amb una mescla de simpatia e de malfisança
Que las formacions sobeiranistas de Quebèc fagan l’esfòrç de se sarrar per mejan del dialòg mutual, es la tòca qu’an declarat los fondadors de la Convergéncia Nacionala, un “projècte de mobilizacion”, coma se definisson. Lor projècte es d’arredondir los angles que separan aquelas formacions e las ajudar a cercar los ponches comuns per balhar de vam a las mobilizacions conjonchas que calga far per far créisser la causa independentista.
La proposicion de l’iniciativa proven dels sòcis del Nòu Movement per Quebèc (NMQ), una organizacion qu’afirma que se preocupa per las bregas existentas entre de personas e de grops que, e mai se confèssan que luchan per la liberacion nacionala de Quebèc, fomentan sovent o mantenon de posicions afrontadas qu’afeblisson o degalhan lo movement independentista.
Lauréanne Daneau, copòrtavotz de l’NMQ, afirma que la Convergéncia Nacionala ofrís “a totes los independentistas las melhoras condicions per que la convergéncia de lors fòrças siá una capitada, un ponch de coesion e d’organizacion de lor eventuala victòria”.
Al meteis moment que se fondava la Convergéncia Nacionala, lo 13 de genièr, s’es anonciat qu’entre los jorns 10 e 12 de mai se debanarà son primièr congrès. Pendent los meses que mancan, los promotors de l’entitat trabalharàn per establir una estrategia acordada per consens fàcia a las eleccions que venon. Lo congrès serà dobèrt a cadun dels movements que vòlon un Quebèc liure, que sián o sián pas de membres de las tres grandas formacions independentistas.
Lo programa del congrès metrà l’accent sus la recèrca de las possiblas formulas d’alianças electoralas, de l’escrutini proporcional e dels metòdes d’accès a l’independéncia. De mai, se concentrarà sus l’aprigondiment de çò que significa l’identitat quebequesa, sus las valors collectivas, sus l’esplecha de las ressorsas naturalas realizada per d’entrepresas estrangièras, sus la preséncia de Quebèc dins lo Mond e sus l’illegitimitat de la Constitucion canadiana.
Pauc d’entosiasme e de malfisanças entre los partits
Un dels primièrs a jónher l’iniciativa, mas amb pauc d’entosiasme, es estat lo principal partit dels independentistas, lo Partit Quebequés (PQ). Lo PQ a paur que la Convergéncia Nacionala venga dins l’avenir un nòu partit rival, e mai se los fondadors o negan. D’un autre costat, lo PQ es encara en espèra de veire cossí se desvoloparà o s’acabarà una autra iniciativa que se sona Front Unit e qu’a de tòcas analògas a las de la Convergéncia Nacionala, mas que, per ara, a pas obtengut gaire d’adesions. La diferéncia principala amb lo Front Unit es que la Convergéncia Nacionala es una proposicion dobèrta e publica, mentre que lo Front Unit se manten en un plan de convèrsa discreta e gaireben secreta entre las formacions independentistas.
Tanben, Opcion Nacionala (ONT) agacha amb simpatia, mas tanben amb un cèrta malfisança, la Convergéncia Nacionala. Perque, coma dison sos caps, ONT trabalha ja per far possible lo dialòg e las alianças entre totas las formacions sobeiranistas.
De son costat, Quebèc Solidari (QS), abans de se prononciar en favor de la Convergéncia Nacionala, vòl conéisser melhor las novetats qu’ofrís aquela nòva iniciativa.
Aqueste article ven del jornal catalan Nationalia.cat, amb qui Jornalet a un acòrdi de cooperacion.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#2 "quora i a una manifestacion basca a Baiona, sempre los Occitanistas son botats en valor, quora son presents ; e malgrat tot aqueles Occitanistas fan la cara quora se parla pas de Baiona basca." Mes los bascos, au parat d'un concors literari trilingüe organizat per ua associacion de quartièr, que hasèn lo mus per'mor que i avè mei de tèxtes occitans que non pas bascos
"çaquelà lo Fenolhedés es ara la sola region occitana qu'a una signaletica bilingüa" Mes Baiona qu'ei estada la prumèra vila a aver indicas en occitan suus panèus direccionaus
"Que faràn los Occitans, los ciutadans occitans, quora auràn minoritats coma los .... sus una espaci qu'auràn lo poder politic vertadièr" Jo que'm pausi la question de saber qué haràn los bascos quan ajan un departament lor. Qué se'n harà de l'occitanitat deu Baish-Ador ? Quan vei los bascos demandar ua senhalizacion bilingua (e non pas trilingua !) a la gara de Baiona qui n'ei pas JAMEI estada en territòri labordin (que hasè partida de la comuna lanesa de Sent Esperit restacada a Baiona en 1857), qu'èi dobtes e n'èi pas enveja de sostiéner aquera reïvindicacion.
"es que un jorn del XXIen sègle, lo Quebèc, aprèp una presentacion onesta de la situacion, a negat l'existéncia de dreits pels autoctònes ?" Ad aquera question que's pòt pausar ua auta question: perqué los inuits deu Quebèc ne son pas estats restacats au Nunavut ?
#2
Car Jacme de Tolosa.
Fa d'ans e d'ans que seguissi çò que se passa en Quebec e la realitat es aquesta : Las fòrças politicas sobeiranistas quinas que siagan oblidan tostemps los inuits e los amerindians quand pensan a l'avenidor d'un Quebec independent ... fan pas çò que los catalans faguèron amb nosaus a la Val d'Aran. Serai lo primièr de lo saludar quand i aurà un cambiament positiu
Aquela critica suls amerindians del Quebèc me remembre que ...
- quora i a una manifestacion basca a Baiona, sempre los Occitanistas son botats en valor, quora son presents ; e malgrat tot aqueles Occitanistas fan la cara quora se parla pas de Baiona basca.
- quora i a una volontat d'independéncia de Catalonha, los Occitanistas an pas cap uèlh a çò que se decidís en Val d'Aran, o gaire ; e çaquelà los Catalans l'an votada la lei de l'autonomia d'Aran, al Parlament de Catalonha. D'aquel temps, un sol occitanista a escrich a Jordi Pujol per aver aquesta autonomia, un sol.
- quora se parla de Perpinyà, se vei sonque la cara de l'accent catalan, e çaquelà lo Fenolhedés (oblidat sempre dels Occitanistas, coma l'Universitat Catalana d'Estiu es oblidada de l'occitanisme oficial de la region) es ara la sola region occitana qu'a una signaletica bilingüa, e que l'occitan es valorizat quitament sus las mapas IGN gràcia a un professor d'universitat, un catalan, professor de geografia a Perpinyà....
Ièu me pausi las doás questions, - que faràn los Occitans, los ciutadans occitans, quora auràn minoritats coma los .... sus una espaci qu'auràn lo poder politic vertadièr (benlèu que lor caldrà abans una administracion realament nacionala). - es que un jorn del XXIen sègle, lo Quebèc, aprèp una presentacion onesta de la situacion, a negat l'existéncia de dreits pels autoctònes ? Ièu m'agradariá de veire sus RFI los reportatges sul tèma aquel, coma n'ai vist sus RCI.
Per astre, Quebèc es pas França, malgrat que son supausats parlar la meteissa lenga, l'etnisme lingüistic o fontanian se pòt pas aplicar a tot...
Una plan bona causa per Quebec ...
Mas se vòlon ganhar los i caldrà pas desbrembar los amerindians e los inuits que votèron pas per l'independéncia per que çò que los i èra prepausat èra la perspectiva d'un Quebec sobeiran e sonque francofòne que l'autonomia d'aqueles pòbles èra quitament pas envisatjada
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari