Bandièra01 1180x150: Comuna de Tolosa

Actualitats

Maites cònsols occitans an pas volgut commemorar l’alta al fuòc en Argeria de fa mièg sègle

Lo cònsol de Niça, Christian Estrosi, a quitament anonciat que pavesarà pas

Lo cònsol de Niça, Christian Estrosi
Lo cònsol de Niça, Christian Estrosi | Richard Ying / LePost.fr
Après un malaisit periple politic e judiciari, lo Conselh Constitucional francés validèt la tardor passada la proposicion de lei qu’establissiá lo 19 de març coma jorn de remembre de la memòria de las victimas de la Guèrra d’Argeria e dels combats en Tunisia e en Marròc. La data commemòra l’alta al fuòc establida l’endeman dels Acòrdis d’Evian de 1962. Mas totes i son pas consents: qualques cònsols occitans, dont qualques unes nascuts en Argeria, an fach boicòt. Considèran que lo 19 de març marca pas la fin de la guèrra, mas qu’es puslèu lo començament dels massarcres dels harkis, los soldats argerians engatjats dins l’armada francesa pendent la guèrra d’independéncia (1957-1962). Creson que de commemorar los acòrdis d’Evian es, doncas, festejar una desfacha. Lo cònsol de Niça, Christian Estrosi, a quitament anonciat que pavesarà pas.
 
Michel Py, cònsol de Leucata (Narbonés) a comunicat al prefècte qu’aquela jornada devesís la “comunautat nacionala”. Raymond Couderc, cònsol de Besièrs, a anonciat que participarà pas a las ceremònias. Tot coma Jean-Pierre Grand, cònsol de Castèlnòu de Les (Montpelhierenc).
 
En Catalonha, lo cònsol de Perpinhan, Jean-Marc Pujol, decidiguèt, de mai, que la bandièra francesa foguèsse ièr a mièja asta a la faciada de l’ostal de la vila.
 
 
Long periple
 
La proposicion de lei per commemorar lo 19 de març comencèt en genièr de 2002, quand una majoritat de deputats d’esquèrra li donèron l’aprobacion. Pasmens, lo procès s’encalèt amb l’arribada de la drecha al poder e se poguèt pas aprovar dins lo Senat fins en octòbre passat, amb lo retorn de l’esquèrra. L’argument favorable es que la data de l’intrada en vigor de l’armistici marquèt una estapa importanta per la patz en Argeria. Per las formacions de drecha, per contra, lo 19 de març desmembra los desenats de milièrs d’harkis e de pènegres assassinats après l’alta al fuòc.
 
A partir de 2003, i aviá una jornada d’omenatge consagrada unicament “als mòrts per França” pendent la Guèrra d’Argeria: lo president d’alavetz, Jacques Chirac, l’instituiguèt lo 5 de decembre, quand inaugurèt un memorial parisenc consagrat als 24 000 militars franceses mòrts pendent lo conflicte.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

romegaire lo pimpanon - tohiston
2.

#1 quiòc, as plan rason ! d'alhors lo 8 de mai desbrembaram pas de celebrar los SS defuntats en mission, Maurici Papon e los collaborators frances e occitans...

  • 2
  • 0
pessemesse siverga 84400
1.

e an agut rason. dins un conflit coma aqèu , cau pas oblidar lei harki e lei pès negres massacrats apès aquesta data, perqué lei laissar fora l'omenatge ?

  • 1
  • 1

Escriu un comentari sus aqueste article