Bandièra01 1180x150: Comuna de Tolosa

Actualitats

Rugbi XIII: Esclarzida pascala

Los resultats de l’abans-darrièra jornada de la primièra fasa del classament aclarisson lo debanament de las fasas finalas. Dimenge, lo cap de fila Pià a Limós (68-18) e sos segonds, los Dragonets, a Vilanòva ( 32-24), renfortiguèron sas posicions. Las quatre equipas concernidas pels barratges s’afrontavan dissabte. Lesinhan vegèt pas lo lum en Avinhon (40-6), mas la recepcion de Vilanòva li deuriá permetre d’acabar en tresena posicion e de reçaupre … Avinhon pel torn de barratge dels 13 o 14 d’abril.
 
A Carcassona, la partida fàcia a Tolosa, se debanèt jos unas fòrtas ramadas de prima. Los locals perdèron lo capitani Saddaoui tocat a l’espatla tre la primèra minuta, mas dobriguèron la marca sus penalitat. Lo mesclanha Keirallah se joguèt per dos còps de la defensa locala per puntar l’ensag. Pichon costat, lo talonaire Quentin Nicòl repliquèt a la mièja-ora de jòc, mas una ataca dirècta sus mesclanha mandava l’alièr tolzan Minga darrèr la linha: 16-8 pels vesitaires a la pausa (e totjorn la pluèja!). A la represa, l’ASC s’installèt dins los 20 mètres dels blaus e blancs. La recòlta foguèt magrinèla: una sola penalitat, e un montairon d’escasenças vendemiadas: jòc al pè previsible, atacas estereotipadas e fautas de man entravèron la bona volontat. E sus una incursion tolzana folzejanta dins lo camp ciutadin, lo tresen linha Masselòt s’espatarrèt al pè dels pals. Tolosa teniá lo revenge de l’anar: 22-10 e reçauprà Carcassona en barratge dins un quinzenat de jorns.
 
Las doas formacions van ara prene la rota d’Anglatèrra per jogar un torn de Cup: Tolosa tre dissabte a Swinton e Carcassona, dimenge, a Workington Town.
 
D’aquel temps, Pià reçauprà Avinhon (dissabte, 17h), puèi dimenge: Vilanòva serà a Lesinhan e Lescura d’Albigés a Sant-Estève.
 
Pels Dracs, lo temps de Pascas es totjorn un moment fòrt de la sason de Super-Liga. Dijòus, la pelena de l’anèxa de Twinckenham poguèt pas reçaupre la partida prevista fàcia als London Broncos. Lo rescontre se tenguèt dins un estadi de banlega d’una equipa de federala de XV amb sa tribuna bèla de 500 plaças e un vestiari pels Dracs montat lèu-fait dins tres corredors! Mas aquò toquèt pas lo moral dels sang e aur que presentavan onze jogaires catalans e occitans sus la “pelena” e que capitèron de l’emportar 30-24.
 
Se trapèt unas bravas suspresas dins los uòus de chocoat del Bon Divendres (Good Friday): Salfòrd ganhèt contra Huddersfield 21-20 e Widnes faguèt plegar Warrington: 38-18. Bradfòrd arranquèt l’egalitat a Leeds 18-18 a la darrièra segonda e Wigan batèt S-Helens: 28-16.
 
E aqueste diluns, èra partida de galà a Brutus amb la recepcion dels campions: los Rinòs de Leeds davant 10 000 espectators. Los Dracs dominèron lo primièr acte, mas sens marcar. Los Rinoceròs marquèron un ensag transformat e, sens se pausar questions, Sinfied ajustèt doas penalitats: 10-0 pels vesitaires a la pausa. A la represa, a la 50a minuta, Bailey secava Tomas Bòsc e l’arbitre sortissiá lo carton roge. L’avantage numeric balhava d’alas als Dracs que marcavan per Leon Pryce e Tomàs Bòsc. Amb las transformacions de Bòsc, los Dracs prenián l’avantatge 12-10 pel primièr còp. Mas lo mestièr e lo realisme de Leeds anava pagar fàcia a la volontat embolhosa catalana: Sinfield egalizava sus penalitat, puèi passava un tombat e los angleses rajustavan dins las darrièras minutas dos ensags transformats e una novèla penalitat. Desfaita amara per unes Dracs en pana de nhac: 27-12 e qu’an encara de mal fàcia a las gròssas equipas.
 
E, per seguir, aqueste dimenge de vèspre: desplaçament a HullFC, qu’a ganhat 34-22 a Wakefield. Se Bradfòrd a batut Salfòrd 36-24, los autres rescontres s’acabèron sus unas marcas amplas: Wigan va ganhar a HullKR: 84-6; Huddersfied bat Widnes 62-6; victòria de Warrington fàcia a Londres 54-20 e de Sant-Helens fàcia a Castlefòrd: 48-18!
 
E òc, es pas aisit d’encadenar tres partidas en dètz jorns! De senhalar, la victòria de l’equipa de França dels cadets fàcia a la Youth England 34-26 divendres a Widnes en seguida de la partida de Super-Liga.
 
Segond acte aqueste dimars 2 a Wakefield. En Copa Déjean, reservada a las Esquipas de Nacionala 1, Vilagalhenc-Argon, venceires de Realmont 24-20 en mièja-finala, deurà batre en Finala los catalans de Salses abans d’anar festejar lo trofèu al cafè de Vilagalhenc. Mas aquesta dimenjada, en Nacionala 1 e 2, las partidas concerniràn las fasas finalas dels campionats.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
1.

Los cadets angleses ganhan la segonda partida : 42-16.

  • 1
  • 0

Escriu un comentari sus aqueste article