Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcGavaldanCausse de Sauvatèrra

Una ministra declara d’ostals en Occitània d’un biais pas gaire transparent

Chanac
Chanac | Szeder László
Los ministres del govèrn francés, comandat per Jean-Marc Ayrault, faguèron public lor patrimòni personal diluns passat, en seguissent una directiva governamentala de transparéncia e en ensajant d’adobar l’imatge marrit qu’a provocat l’afar Cahuzac.
 
Demest los ministres qu’an publicat lor patrimòni, cal soslinhar la ministra de l’Ensenhament Superior e de la Recèrca, Geneviève Fioraso, qu’a declarat aver qualques bens immobilièrs dont la mitat d’un ostal de 60 m² a Chanac.
 
Al costat del nom de la comuna, notèt lo numèro del departament: 43. Es aquí que i a quicòm que truca. Lo 43 es lo numèro del departament del Naut Léger (aperaquí Brivadés e Velai): i a 260 comunas mas cap d’elas es Chanac.
 
Chanac se tròba al Causse de Sauvatèrra, a la riba sud d’Òlt, en fàcia del país de Marjarida. Segon l’administracion departamentala francesa, se tròba dins lo departament de Losera qu’a lo numèro 48.
 
Que siá una error geografica, de picatge o de chifras, los 1395 abitants del vilatge de Chanac seràn estonats d’aprene, s’o sabián pas encara, que la ministra Fioraso a una residéncia dins lor vilatge, qu’es pas mai sul Causse de Sauvatèrra mas endacòm en Velai, Brivadés o Naut Léger.
 
En mai d’aquel ostal eiretat, la ministra Fioraso n’a un autre de 150 m2 que crompèt dins lo Nauts Aups de Provença, declarat dins una comuna nomenada en francés “Vallonise”. La redaccion de Jornalet a pas capitat encara de saber de quala comuna s’agís, mas podèm imaginar que deu èsser Vauloïsa en Briançonés.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jacme Tolosa
3.

Un amic occitanista a jamai poscut ensenhar a París : «perqué aviá un accent basco de Carcassona», los franceses sábon pas la geografia (es ontologic al sistèma educatiu) e encara mens las colonias occitanas. Donc es pas estonent !

  • 0
  • 0
Ambrunés Chastel aurós (Châteauroux)
2.

La "valuá de Vièra" es lo nom vivaroalpin de la "Vallouise", nomenaa per avant en francés "Valpute" perqué i èran tròp de protestants au gost dau poire catolic francés...

  • 1
  • 0
Nenon
1.

Coma lo departiment 05 : es las "Autas Alps/Aups". Nauts Aups "de Provença" aquel nom de farlabica existe pas, eventualament s'i pòl ajustar "Dalfinat occitan".
Autrament "Velai de Lengadòc" poiriá existir (qu'es istoric), mas es un nom inexistent.

  • 0
  • 0

Escriu un comentari sus aqueste article