Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

Catalonha que començarà a bastir lèu era naua Lei d’Aran

Eth deputat aranés, Àlex Moga, que demanèc ath Parlament de Catalonha era constitucion dera ponéncia entà bastir era naua Lei d’Aran. Era vicepresidenta deth govèrn de Catalonha s’engatgèc a amiar-la a tèrme pendent aguesta legislatura e s’engatgèc a deféner era indentitat nacionau d’Aran e era lengua occitana dauant dera intransigéncia deth govèrn espanhòu.


Eth deputat aranés en Parlament de Catalonha, Àlex Moga, de Convergéncia e Union (CiU), que sollicitèc agèr ara Generalitat de Catalonha de començar era tramitacion d’ua naua Lei d’Aran, entà méter a jorn era lei de 1991. Era vicepresidenta catalana, Joana Ortega, s’engatgèc a amiar-la a tèrme pendent aguesta legislatura e a deféner era indentitat nacionau d’Aran e era sua lengua dauant dera intransigéncia deth govèrn espanhòu.
 
Pendent era sua intervencion en Parlament, Moga rebrembèc eth 700u anniversari dera reconeishença nacionau d’Aran damb era Querimònia. Segontes Moga, era Val d’Aran ei  lingüisticament e istoricament occitana mès “junhuda liurament a trauèrs de pacte ath Principat de Catalonha”. “En 1313 es aranesi determinèren per votacion populara era permanéncia dera Val d’Aran ara Corona Catalanoaragonesa ath còp que Jaime II autregèc er amàs de privilètges nomentat era Querimònia, vertadèra carta magna d’Aran”, ce ahigèc.
 
Moga arrebrembèc qu’ “era actuau Lei d’Aran creèc un govèrn damb capacitat de gerir era cultura, joenessa, servicis sociaus, torisme, es nòsti bòsqui... e tanben mos a permetut potenciar era nòsta lengua, fomentar-la e introdusir-la enes escòles”. De hèt, er Estatut de Catalonha de 2006 definís Aran coma realitat nacionau occitana.
 
Eth deputat aranés que demanèc ara vicepresidenta deth govèrn de Catalonha de repréner era volentat dera legislatura precedenta de constituïr era ponéncia entà dar responsa “as desirs deth pòble d’Aran qu’ambicione mès quòta de govèrn, mès capacitat juridica e un nau sistèma de finançament”. Àlex Moga qu’arregraïc qu’entà Aran, “Catalonha a estat un exemple de reconeishença nacionau; a estat un binòmi d’exemple internacionau”. Per aguest motiu, be cau “arreconéisher es 700 ans d’Aran, un pòble arreconeishut peth Parlament de Catalonha”.
 
Deth sòn costat, era vicepresidenta deth Govèrn e conselhèra de governacion, Joana Ortega, s’engatgèc a començar era tramitacion dera naua Lei d’Aran pendent aguesta legislatura entà contunhar damb era sua arreconeishença de realitat. Ortega assegurèc, tanben en aranés, qu’eth Govèrn dera Generalitat defenerà era identitat nacionau d’Aran e era lengua occitana dauant dera intransigència deth govèrn espanhòu.




GCA/FM

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

fabre Murèth
2.

Tot just, mas se tròba que los nòstres elegits sabon pas mai parlar occitan , son pas aqui per la cultura , la literatura, la democracia , lo patrimòni occitan, non , son pas aqui que pel plan de carrièra e la paga d'elegit e la retirada reiala d'elegit , pels mai benastrucs... Son pas aqui que per demandar d'ajuda a Paris per recaptar o distribuir l'argent que Paris rastissa de pertot.
Sem al cap del camin , a l'ora de la causida....

  • 1
  • 0
Terric Lausa Quilhan
1.

En defòra de las consideracions politicas, soi fièr cada còp qu'ausissi la lenga nòstra s'exprimir dins una institucion politica.

Es una fiertat que lo pietadós estat francés nos refusa al Parlament francés.

Malaürosament per Occitània e la lenga occitana, es una fiertat qu'utilizan pas los elegits occitans dins las institucions politicas localas: conselhs generals occitans, conselh regionals occitans, conselhs municipals occitans: quin elegit gausa desobeïr en non pas emplegar lo francés ?

Tristament, l'insomission lingüistica es pas encara coneguda dels nòstres elegits occitans. Per contra l'asserviment lingüistic o es.

Que prengan leiçons dels nòstres fraires catalans:

http://www.europapress.tv/politica/181750/1/tres-diputados-expulsados-hablar-catalan.html

http://www.youtube.com/watch?v=980NXvi3pCI

  • 7
  • 1

Escriu un comentari sus aqueste article