Bandièra01 1180x150: Comuna de Tolosa

Actualitats

Los dètz e nòu passes cap a l’independéncia de Catalonha, segon lo Conselh Assessor per la Transicion

Lo govèrn catalan dispausarà en julhet de las recomandacions sus cossí far la consulta e quora

Lo govèrn autonòm de la Generalitat de Catalonha dispausarà a la fin del mes de julhet d’un estudi del Conselh Assessor per la Transicion Nacionala amb las recomandacions sus cossí far la consulta, quora la far e quina question i formular. O anoncièt dijòus passat lo president del Conselh, Carles Viver Pi-Sunyer, qu’a expausat lo trabalh que farà aquestes meses venents: elaborarà dètz e nòu rapòrts, la màger part d’eles sus los passes que caldriá far per avançar cap a l’estat catalan independent.
 
Lo primièr estudi serà sus lo moment de convocar la consulta e la manièra d’o far. Pi-Sunyer a daissada dobèrta la possibilitat que i aja mai d’una question, es a dire, que sián doas o quitament tres, “en forma d’arbre”. “Analisarem tanben las garentidas qu’a de téner la consulta”, çò a dich, “e los possibles resultats e consequéncias. E quina pòt èsser la reaccion de l’estat.” Al costat de l’analisi juridica de las opcions per convocar la consulta, tanben a explicat net e clar que s’examinarà “las vias alternativas, mai politicas, per la poder far.”
 
Los autres dètz e uèch rapòrts se liuraràn, la màger part, en fin d’annada, entre octòbre e decembre; e los darrièrs, lo primièr trimèstre de 2014. Seràn d’analisis de las decisions fondamentalas que s’aurà de prene en prevesent que la consulta mene a la constitucion d’un estat independent. “Ajudam a analisar las estructuras previstas en supausant un resultat favorable a l’estat independent”, çò a dich Pi-Sunyer, que non a pas barrat la pòrta al fach que lo conselh analise de formulas d’estat federal o confederal.
 
Vaicí los dètz e nòu rapòrts que lo conselh prevei d’elaborar:
 
1. La via per la convocacion de la consulta.
 
2. Las relacions de l’estat novèl amb l’UE. Ne fariá partida o non? Se ne demorèsse en defòra, cossí i poiriá tornar intrar? Cossí l’afectarián los acòrdis de Schengen e l’Espaci Economic Europèu?
 
3. Las relacions de l’estat catalan amb la comunautat internacionala, de l’ÒNU fins a l’UNÈSCO, en passant per d’organizacions internacionalas e en analisant cossí l’influirián los tractats que los a signats amb Espanha.
 
4. Las relacions futuras amb l’estat espanhòl. “L’estat novèl auriá d’aver de relacions estrechissimas amb l’estat espanhòl”, çò a dich Pi-Sunyer.
 
5. La succession de las nòrmas juridicas. “Lo primièr jorn amb l’estat novèl nos trobariam que l’ordenament juridic poiriá aver de lacunas”, çò obsèrba Pi-Sunyer. “Tendriam pas de còde penal, ni de lei d’enseguida criminala... O nos cal preveire, aquò. Que ne fasèm, del còde penal? Caldrà inventar de formulas de remandaments a qualques autras legislacions. E los contractes amb l’estat?”
 
6. Cossí cal far lo procès constituent? Cal téner una constitucion. “Saique una idèa seriá de far una constitucion provisòria, de non assajar de far la constitucion catalana sus lo còp, la primièra setmana”, çò ditz lo president del Conselh, que considèra que caldriá aver reculhits sus lo còp los dreches fondamentals, amb de remandaments a l’estatut de 2005, e i caldriá incorporar de decisions importantas, coma la nacionalitat dobla o la reconeissença de las lengas.
 
7. Lo poder judiciari en Catalonha. Pi-Sunyer ditz: “Quant de jutges tendrem, e quant de secretaris de justícia? Cal assegurar que se poirà administrar la justícia tre la primièra setmana. Que ne fasèm, dels procèsses en cors dins de tribunals del domeni espanhòl? Cossí abordam l’execucion de las senténcias dempuèi aqueles tirbunals? Caldrà un organ de govèrn del poder judiciari.”
 
8. Rapòrt sus la seguretat intèrna e internacionala.
 
9. Las administracions sectorialas, coma l’administracion electorala.
 
10. De questions economicas, coma lo fisc de l’estat pròpri, los sistèmas per percebre los impòstes, las cargas.
 
11. La definicion de l’agéncia fiscala catalana.
 
12. Las institucions financièras coma la banca centrala e lo mantenement de l’èuro.
 
13. Las agéncias e organismes regulators que caldrà aver, car l’UE n’exigís d’unes.
 
14. La reparticion dels actius e passius que caldrà aver entre la Generalitat e l’estat espanhòl, comprés lo deute.
 
15. Los efièches de l’estat pròpri dins las relacions comercialas entre Espanha e Catalonha.
 
16. Lo foncionament de la seguretat sociala catalana.
 
17. Cossí assegurar la liurason d’energia e de ressorsas idraulicas tre lo primièr moment de l’independéncia?
 
18. La definicion de l’espaci de telecomunicacions.
 
19. L’internacionalizacion del procès.
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Tòni Pònt de Rei
6.

#5 qu'ei era pausicion d'Unitat d'Aran ?

  • 4
  • 0
Eth Bandolèr Gargàs
5.

Tot aquò soa plan e magnific, totun era respòsta populara au referendum arrisca plan d'estar un non ara independéncia qui sosprenerà mei d'un lector deu jornalet, pas a jo. Los catalans non son pas revolucionaris sauv en saunei. E l'independéncia, aquerò, òc, qu'ei ua revolucion!

  • 1
  • 1
pessamessa siverga
4.

tot es previst , alevat benlèu l'esfondrament de l'euro o l'Europa que parte en dolilhas...

  • 1
  • 0
Frederic Monpotz Vilafranca de Lauragués
3.

Aqueles Catalans, o comptan tot plan menimosament, tant dins la sardana coma dins l'indepententisme ! Mas a la fin, sempre i son, sempre i van. E non s'enganan ! Sardan… Cresètz que me trufi ! Pensatz, per nosautres, tant fina e bèla coma o pòt èsser, es mailèu "la música callada" del mieu gaireben omonim…

  • 5
  • 0
manjacostel Mureth
2.

Aquò's plan de tot aplechar coma cal. Cresi que soscan un pauc trop..Consi an fach Ucraïna, Letonia , Macedonia, Chequia. .... Oblidan que lo temps joga pels enemics de Catalonha que son fòrça numero)ses e dangieroses.. Parlan pas que de procès coma se la justicia necessitava de gisclar, coma l'esportiu que giscla dels startings blocs, al senhal .

  • 3
  • 0

Escriu un comentari sus aqueste article