Bandièra01 1180x150: Comuna de Tolosa

Actualitats

Rugbi XIII: Un campionat sens campion?

| Drew Douglas

A XIII, res se passa pas jamai coma endacòm mai. Se lo Congrès de la Federacion decidiguèt de l’instauracion d’un bònus defensiu, sèm totjorn dins lo fosc mai complet per las esquipas que jogaràn l’an que ven la competicion d’Elèit 1.


Se sap que lo campion catalan d’Elèit 2, Palau, montarà, mas Lescura voldriá davalar: per aquò far, caldriá un acòrdi amb Albi que montariá, mas los 2 clubs an dificultats (eufemisme) per dialogar.
 
Mai grèu: se sap pas se lo campion Pià serà de la partida. L’esquipa arriba pas a trapar una direccion e un un president novèls: l’ancian es totjorn jol còp d’una suspension de 6 ans aprèp las menaças de l’an passat de pas jogar la finala de la Copa. Lo despelhatge a ja començat: lo menaire de jòc Ivan Gressèque e lo pilar Ben Vaeau son anonciats a Carcassona e lo mesclanha Dustin Cooper a Lesinhan. D’esperar que la situacion se decante lèu…
 
Los Dracs passèron, elis, a Brutús, un bon dissabte en trapant tornarmai tota lor vertut defensiva que faguèt que las Aglas de mar del HullFC passèron la linha qu’un sol còp, alara que los sang e aur marcavan tres còps dins lo primièr temps (Vaccari, Escarré e Dupòrt) per menar 18-4 a la pausa; tre la represa, Kevin Larroyer fasiá montar la diferéncia abans que los Dracs se perdèssen dins l’a-pus-prèp mas, a cinc minutas de la fin, confirmèron la victòria mercé a un segond ensag de Dupòrt trigoçant tres adversaris sus l’esquina sus 10 mètres: 30-4 amb la cinquena transformacion ensacada per Tomas Bòsc.
 
Ara, pels jogaires, una pausa de quinze jorns abans la partida venenta contra HullKR lo dissabte 22 a l’estadi Wallon de Tolosa.
 
Sols, Menzies e Taia an al programa una partida amb la formacion dels Exiliats contra Anglatèrra aqueste divendres a Warrington.
 
Los Dracs tornaràn trapar lo HullFC lo 13 de julh a Brutús pel compte dels quarts de la Cup. Dimenge, se ganhèron los darrièrs bloquièrs de la sason: lo XIII Catalan en cadets (victòria 32-20 fàcia a Avinhon) e St-Estève en minimes (venceires dels vesins del XIII catalan: 12-10).
 
Als Antipòdis, dimècres, dabans mai de 90 000 espectators, sens parlar de la retransmission televisada dins un centenat de païses, los Blaus de la Nòva Galas del Sud, qu’avián causit lo rejoveniment de lor esquipa, l’emportèron 14-6 fàcia als Malves de la Tèrra de la Reina (Queensland) dins la primièra partida de la tièra dels tres Estats d’origina. Revenge lo 26 de junh a Brisbana: los Blaus somian de remportar la tièra dels rescontres, çò que lor i es pas arribat dempuèi 2005.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Escriu un comentari sus aqueste article