Bandièra01 1180x150: Comuna de Tolosa

Actualitats

Grècia sens television ni ràdio publicas

ERT a quitat d’emetre per òrdre del govèrn grèc, en compliment del plan impausat per la tròica

La television e la ràdio publicas de Grècia (ERT) quitèron d’emetre dimècres a mièjanuèch, après setanta cinc ans. Lo govèrn o anoncièt solament qualques oras abans, en argumentant lo compliment del plan d’austeritat impausat per la tròica comunautària. La decision generèt una fòrta protèsta: los salariats s’embarrèron dins la bastissa, del temps que per carrièras de milièrs de manifestants s’amassavan davant l’edifici.
 
“ERT es un cas caracteristic d’opacitat e despensa sens fren. E aquò uèi es acabat”, anonciava dimars passat lo pòrtavotz del govèrn grèc, Simos Kedikoglou, en un messatge televisat. “Lo govèrn a decidit de barrar ERT. En substitucion, emetrà una television e una ràdio mai modèrnas que començaràn d’operar al mai lèu”, çò apondèt.
 
Dins l’entitat publica i a 2800 salariats. Se sap pas encara se lo govèrn los licenciarà totes e se contractarà de nòus trabalhadors o se sonque ne licienciarà d’unes.
 
Aital, lo govèrn complís un dels requisits impausats per la tròica, que permetèt pas que Grècia e vendèsse de gas a Russia mas que l’obliga de licenciar 2000 foncionaris abans la fin de l’an e 15 000 pendent 2014.
 
Lo partit Esquèrra Democratica (Dimar), que fa partida de la coalicion de govèrn, a ja dich que considèra inconcebable que Grècia aja pas una television e una ràdio publicas.
 
Per quant al movement d’oposicion d’esquèrra Syriza, son menaire, Alexis Tsipras,  anèt sus lo còp sosténer los emplegats menaçats dins l’edifici d’ERT, dimècres de ser.


Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lutz
3.

Plorar sus la tampadura de la television, es creire que la television nos informa, non ?

  • 2
  • 0
Pirolet
2.

Almens, la television publica occitana risca pas res. Se pòt pas tampar çò qu'es pas estat jamai dobèrt.

  • 10
  • 0
Laurenç
1.

Aquò fa páur de véser cossí fa lo poder en Grècia. Urosament, lo pòble protèsta per las carrièras e sosten la ràdio e television publicas. E en Catalonha, son a a far tanben de "retalladas" a TV3 e Catalunya ràdio (ja que TV3 a pas pus de burèu a Perpinhan).

  • 10
  • 0

Escriu un comentari sus aqueste article