Bandièra01 1180x150: Comuna de Tolosa

Actualitats

crotz-tolosaCreated with Sketch.ProvençaProvençaPaís d'Ais

Maryse Joissains-Masini: "François Hollande es illegitim"

La deputada-consolessa d'Ais de Provença a fach un discors musclat contra François Hollande

| joissainsmasini2012.com

Segon Joissains-Massini, Hollande es un president "illegitim" e "ridicul", e mai un "perilh per la Republica." La deputada-consolessa d'Ais de Provença a apondut que la siá vila farà la resisténcia a l'imatge d'un "vilatge gallés".


Qualques minutas après l'eleccion de François Hollande, la deputada-consolessa d'Ais de Provença n'a fach un discors musclat. Marysse Joissains-Masini a parlat, sens i metre de sal ni de pebre, en disent que s'agís d'un president "illegitim" e "ridicul" e quitament d'un "perilh per la Republica." Environat d'una "banda de rigolòs" lo nòu pensionari de l'Elisi es pas "fisicament" bon per dirigir lo país. La deputada-consolessa d'Ais de Provença a apondut que la siá vila farà la resisténcia a l'imatge d'un "vilatge gallés".

Joissains-Masini es sòcia de la Drecha Populara, la drecha de l'UMP.

Las declaracions son estadas filmadas e publicadas per Aix News.


Vaquí qualques unas de las siás afirmacions:

"A Ais de Provença avèm ganhat. Sénher Sarkozy arriba primièr. Ai tendéncia de pensar qu'a Ais de Provença sèm mai intelligents qu'endacòm mai."

"Malgrat que Sénher Hollande es proclamat president de la Republica, pensi pas que siá legitim, perque i arriba après un combat antidemocratic coma s'es pas jamai vist dins aqueste país."

"Espèri que la joinesa d'aqueste país va pas patir, dins los ans a venir, la banda de rigolòs que se van emparar de las comandas. Doncas, ieu espèri que mon país se'n cope lo morre. Pensi que Nicolas Sarkozy poiriá servir de recors dins pas tant longtemps qu'aquò."

"François Hollande es un perilh per la Republica. Aquel òme a pas fach jamai la demostracion qu'aja fach quicòm dins la siá vida. Lo cresi pas competent, ni capable. En tot cas fisicament donarà pas l'imatge d'un president de la Republica. M’auriá agradat un president qu'aguèsse mai de prestança e non pas que bandiguèsse los sieus pichons braces coma o fa dins totes los sieus mitings perque aquò me sembla extrèmament ridicul."

"I aguèt lo quatren torn, aquel de las promessas que seràn pas tengudas, perque o poiràn pas èsser. A qui s’aprendrà? Los socialistas an totjorn dich : "responsables, mas pas copables." Vos remembratz de la question del sang contaminat ont i a agut de centenats de milièrs de mòrts? Se n'es pas parlat, s'evòca pas mai."

"Los mèdias an pas fach lo bilanç (de Nicolas Sarkozy). Avián tròp paur que Sénher Hollande foguèsse tombat entièrament. Ara, espèri amb tranquillitat, felicitat. A partir de deman, se rasarà a gratis."

"Pensi que Sénher Hollande meritava pas d’èsser president de la Republica Francesa. Soi en còlera. Soi pas serena del tot. I a pas agut que d'antisarkozysme. Aquò es ridicul dins lo mond entièr."

"Ai la nhaca a las dents, ai la ràbia al ventre e me vau pas daissar tombar. Vau pas far los discorses convencionals, convencionats : "li desiri bon astre..." Pas del tot, soi en combat."

"Aquel tipe ailà merita pas d’èsser ont es. Ponch barra. Es estat poderosament ajudat per un estat tot entièr. Quitament los sindicats s'i son meses. Aürosament, perque es passat a un pichon ponch e aiçò sembla los sieus bracets. L'aimi pas, o disi, o tornarai dire, afirmar e confirmar. Aqueste serà lo vilatge gallés".

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gerard-Joan Barceló Pèiralata
6.

Normau, de part d'un personatge reaccionari e, probable, inculte, que, dos ans fai, defendèt lo secessionisme lingüistic promogut per lei pseudomistralencs e pseudoprovençalistas dau Collectiu Provença : http://www.collectifprovence.com/spip.php?article282 .

  • 1
  • 0
Alícia Montpelhièr
5.

Es una fadòrla, aicesta paurassa ! Te nos manda au morre tota una pluèja de senténcias ridiculas qu'injustificadas, e pretend nos convéncer sonque qu'amb d'assercions peremptòrias tan nècias coma bufècas. Diagnosticariái un cas d'isteria, ligada a de blocatges serioses de la sexualitat, que pòdon desembocar sus unes sentiments de frustracions agudas se mudant en fixacions obsecionalas jos la forma de crisis d'asir e de mesprètz delirantas. Çò qu'es vertadièrament mesprezat aicí ? La còlha socialista e son elegit, o la libertat qu'afican (o representan dins son imaginari patologic) e qu'aicesta malauta se vòu pas saber existir dins l'ombra de son inconscient ?

  • 3
  • 0
Pirolet
4.

Avètz vist la videò? Dèu ésser lo Crist que li alisa los tetons que la fa desparlar.

  • 3
  • 1
Paul
3.

# "A Ais de Provença avèm ganhat. Sénher Sarkozy arriba primièr. Ai tendéncia de pensar qu'a Ais de Provença sèm mai intelligents qu'endacòm mai."

# "Malgrat que Sénher Hollande es proclamat president de la Republica, pensi pas que siá legitim, perque i arriba après un combat antidemocratic coma s'es pas jamai vist dins aqueste país."

Que blaga. Mancariá plus que lo país d'Ais de Provença ò lei departiments que votèron a majoritat Sarkozy faguèsson secessien de França.
La lenga occitana, coma bèus promier lei movements occitans, subísson pas un combat anti democratic ? Que subísson lo jacobinisme centralista de lònga e son esquichats per fin que faguèsson silenci.

  • 2
  • 0
Batko
2.

E aquò s'apèra ua "'responsabla" politica ? Pas tròp bona perdenta, de tot biaish ...

  • 2
  • 0

Escriu un comentari sus aqueste article