Bandièra01 1180x150: Comuna de Tolosa

Actualitats

Polinesia a demandat a França la reconeissença oficiala de las lengas insularas dins l’Assemblada e lo Govèrn autonomics

| Mitch Allen

L’Assemblada de las Illas del Pacific demanda un emendament a la Constitucion Francesa. La demanda arriba après que lo Conselh d’Estat francés declarèsse illegalas doas leis polinesianas perque la session parlamentària s’èra debanada en tahitian.


L’Assemblada de la Polinesia Francesa a demandat a París qu’emende la Constitucion Francesa per que se pòsca oficializar l’usatge de divèrsas lengas polinesianas al sen del govèrn e del parlament de las illas. Divendres, l’Assemblada aprovèt una resolucion amb 46 vòtes favorables e 11 abstencions. Totes los deputats autonomistas se mostrèron partisans de la resolucion, del temps que las abstencions foguèron totas de deputats independentistas, que considèran que la redaccion es tròp febla.
 
L’Assemblada polinesiana vòl que l’Assemblada Nacionala francesa introdusisca un emendament dins l’article 74 de la Constitucion, per fin que las collectivitats d’otramar (territòris autonòms de França en defòra d’Euròpa, e que Polinesia n’es un) pòscan prene de decisions, d’un biais autonòm, tocant lo “patrimòni cultural e lingüistic”. Aquò poiriá dobrir la pòrta a agrandir los domenis d’usatge oficial de las lengas pròprias de Polinesia (que lo tahitian n’es la principala) dins d’entitats publicas coma lo Govèrn e l’Assemblada de las illas.
 
La resolucion arriba qualques setmanas après que lo Conselh d’Estat francés declarèsse illegalas doas leis polinesianas perque foguèron aprovadas pendent una session ont s’èra utilizat lo tahitian. Lo Conselh argumentèt que la sola lenga oficiala de la Republica Francesa es lo francés e que, de mai, l’Estatut de Polinesia prevei solament l’usatge del tahitian dins las entitats privadas, entre individús e dins l’escòla.
 
Fins ara, l’usatge del tahitian èra estat abitual dins l’Assemblada d’aquelas illas del Pacific, amb un sistèma de traduccion simultanèa cap al francés, disponible per aqueles deputats que comprenon pas aquela lenga.

 
 
 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

lo breton
1.

Se porià far una lei sonque amb totas las lengas minoralas de l'estat frances benleu.

  • 2
  • 0

Escriu un comentari sus aqueste article