Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcAlbigésCastrés

Es mòrt l’entrepreneire occitan Pierre Fabre

L’entrepreneire occitan Pierre Fabre moriguèt dissabte de matin a La Vaur (Lauragués), a 87 ans, en seguida d’una longa malautiá. Aviá fondat en 1961 lo laboratòri farmaceutic del meteis nom que venguèt un gigant del sector de la farmacia e dels cosmetics, amb de marcas conegudas coma Eau Thermale, Avène, Klorane, Galenic o René Furterer.
 
L’entrepresa castresa atenguèt una dimension internacionala amb 42 filialas e de produches distribuits dins mai de 130 païses.
 
Pierre Fabre nasquèt a Castras (Castrés) en 1926, foguèt farmacian d’oficina dins una farmacia de Castras qu’encara existís. En 1961, Fabre, dins sos 35 ans, i inventèt lo primièr venotonic e creèt lo laboratòri que pòrta son nom. Quatre ans puèi crompèt los laboratòris Klorane, ponch de partença de sas activitats dins la dermocosmetica. Aquel sector representa uèi 53% dels revenguts del grop, es a dire 1,045 miliards d’èuros sus 1,978 miliards d’èuros a la fin de 2012.
 
Lo laboratòri Fabre compta amb 10 000 salariats per tot lo Mond, dont mai de la mitat en Occitània; a 42 filialas e distribuís sos produches dins 130 païses.
 
Fabre èra un òme d’una discrecion legendària que se vantava pas de la reüssida de son grop, e cotizava pas manco en borsa.
 
Èra celibatari, sens enfants e dempuèi mai d’una annada exercissiá pas mai la direccion operacionala de l’entrepresa. En 2008 transferiguèt dos tèrces del capital a una fondacion.
 
A títol personal, Pierre Fabre investiguèt fòrça dins los mèdias a travèrs de sa societat Sud Communicacion (grop Valmonde, La Dépêche du Midi) e sosteniá financièrament, dempuèi 25 ans, l’esquipa de rugbi de la Castras Olimpica.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jacme Tolosa, decentralizat de Castras
8.

Primièra prefectura de Tarn foguèt Castras (1790-1797)... O cal pas oblidar ; e son los foncionaris de la futura prefectorala, per rasons dels monuments d'Albi, e dels ligams ecclesials, que faguèron mudar lo capluòc departamental que disèm ara prefectura.

Castras èra mai bèl qu'Albi, en 1790.

Sobre l'occitanitat de Pierre Fabre ... se cal questionar de saber perqué es pas estat questionat mai sovent per sosténer projectes ! Puslèu que de questionar la seuna occitanitat, devath lo pretèxte que l'identitat occitana non pòt existar ; non pòt existar perqué los meteisses occitanistas i creson pas !

Mon grand-paire se disiá pas francés, nimai Agenés, ni Peirigordin, ni sabi pas qué ....

  • 0
  • 0
joanamalric Masamet
7.

"L'estela negre que se gravite a l'entorn sens jamai la veire".  
Polida definicion me sembla.
Que me semble tanben que cal faire ausir un autre discors que lo concèrt de lausenjas unanime d'ara.

http://www.lexpress.fr/actualite/economie/l-empire-de-l-influence_491279.html

  • 0
  • 0
Gabrièu Balloux Bordèu
6.

#5
-- "... I a una vertadièra consciéncia occitana" >> bien solide, sustot desempui les annadas 1960-70...e encara, dens lo mitan occitanista unicament. Los que saben parlar occitan (patoàs) m'estonaré que se considerèssin Occitans.
-- " ligams istòrics" >> i a jamèi aujut de provinça "Occitània"
-- "culturals (los trobadors per ne'n dire quns)" >> òc, los quauques trobadors, los erudits, que s'interessèren a normalisar la lenga, bien chic de gents per rapòrt au pòple
-- "o encara lingüistics " >> demb aquò sui bien d'acòrd
-- "E Peire Fabre èra ben un occitan : a començar per l'accent, tanben sosteniá lo CO, la Despacha, etc. Era ben ancorat aicí " >> mès segur !! es simplament la faiçon de diser "viver en Occitània" e sustot "estar un Occitan" (tot aquò au sens aut que lingüistic) que tròbi artificiala, evidenta per tots dens nòste micromitan occitanista mès per digun dens la populacion, fòrt mens que non pas "estar gascon", "estar provençau" etc.

albigés : :òc, d'acòrd; pensèvi a Albigés dens lo sens "viscomtat d'Albi"

Amistats tanben

  • 1
  • 2
Damian Tolosa
5.

@ Gabrièu

Soi pas d'acòrdi ... I a una vertadièra consciéncia occitana, facha de ligams istòrics, culturals (los trobadors per ne'n dire quns) o encara lingüistics ( la lenga d'òc amb sas variantas, aquò qu'es scientificament provat !).

(E mai que los nissarts volon un pauc se destacar ^^)

E Peire Fabre èra ben un occitan : a començar per l'accent, tanben sosteniá lo CO, la Despacha, etc. Era ben ancorat aicí :-) (cf. sites de La Vaur o Castras...)

E ne'n profiti per vos dire qu'èra pas albigés, coma l'escrivètz, mas ben castrés.
E tanben, pichona correction lingüistica : Coma se + subjonctiu imperfach. ---> Coma se "occitan" foguèsse una identitat... :-)

amistats

  • 3
  • 1
Terric Lausa Quilhan
4.

#2

Çò meteis amb lo francés: es sonque lo nom d'una lenga.

Per exemple: "Marcel Proust, escriveire parisenc", que francés, quò's una lenga......

  • 5
  • 2

Escriu un comentari sus aqueste article