Bandièra01 1180x150: Comuna de Tolosa

Actualitats

“Marselha deu pas venir Chicago”

Lo president la comunautat urbana de Marselha a demandat al ministre de l’Interior lo classament de la vila coma ZSP. Valls a refusat

| Philippe Maille
Lo president de la comunautat urbana de Marselha, Eugène Caselli, mandèt una letra al ministre de l’Interior francés, Manuel Valls, per demandar lo classament de tota la vila coma zòna de seguretat prioritària (ZSP). Dins la letra, Caselli manifèsta que Marselha “deu pas devenir Chicago”.
 
“Davant la novèla onda de violéncia que frapèt Marselha diluns e dimars, escriguèri au ministre Valls per li demandar de renfòrç policiers e l’inclusion de tota la vila en la lista dei zònas prioritàrias de seguretat”, çò expliquèt Caselli.
 
Qualques minutas abans la miejanuèch de diluns, trobèron lo còrs parcialament cremat d’un jove de 22 ans, mòrt d’una bala dins lo cap. Aquela meteissa nuèch, dos òmes de 30 ans foguèron ferits après èsser fusilhats a distància dempuèi una motocicleta dins una zòna industriala del quartièr de Sant Pèire. Tanben un menaire de camion de las escobilhas foguèt ferit amb un pistolet d’aire comprimit.
 
“Siáu inquiet e en colèra, la situacion a pres una amplor talament granda que la respònsa pòt èsser ren qu’a l’auçada d’aquelei derivas”, çò insistiguèt Caselli.
 
Mas en de declaracions a la ràdio France Info, Valls refusèt la demanda del president de Marselha pr’amor que, segon el, “un dispositiu aital seriá pas eficaç e auriá pas cap de sens”, en afirmant que de mejans excepcionals son estats desvolopats dins la Ciutat Focèa.
 
“Seriá pas realista, pas eficaç, e auriá pas cap de sens: las ZSP son de dispositius ciblats”, çò argumentèt Valls. “Sonque l’ipercentre es pas en zòna de seguretat prioritària. Los Quartièrs Nòrd e los Quartièrs Sud i son”, çò apondèt lo ministre en tot remembrar que 230 policièrs e gendarmas suplementaris, e tanben tres unitats de fòrças mobilas, se son desplegats a Marselha per combatre la violéncia.
 
Se Caselli es ben del Partit Socialista (lo meteis partit que Valls), en setembre de 2012 lo senator-cònsol de la Ciutat Focèa, Jean-Claude Gaudin, qu’es de l’UMP, aviá demandat çò meteis al ministre de l’Interior, e Valls acusèt Gaudin de “demagogia”.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ernèst Guevara Jr. L'Avana
3.

Las màfias se fan lo lièit dins la misèria, lo desesper social e las inegalitats creissentas. Amb l'austeritarisme de mai en mai autoritari d'Euròpa, de polagalha, ne pòdon ficar tant coma o voldràn, jamai curaràn pas lo doat que ne monta la pudesina del crimi e de la violéncia. Per véncer la violéncia a Marselha o endacòm mai, ne cal acabar amb lo liberalisme, l'eurò, lo liure escambi, tornar botar en plaça de barralhas doanièras estrictas per las mercandesas (per estalviar lo dumping social), taxar violentament los revenguts financièrs (non ligats a la produccion de mercandesas, tot çò especulatiu) per fin de n'acabar amb lo caumatge. Tot çò de qu'avèm besonh, o cal fabregar a çò nòstre, per tornar a l'emplèc plenièr, dins una ret de proteccion sociala fòrta qu'apara lo mai grand nombre possible de l'insecuritat materiala. Cal restablir un ligam fòrt entrte los estudis e lo mercat de l'emplèc, motivant los mai paures a estudiar mai que de trevar per carrièras armas al punh per se traire de la misèria. Se los estudis pagan pas, perqué estudiar ? Se lo trabalh paga pas, perqué trabalhar ? Se res paga pas pro ni mai en defòra del crimi, cossí lo crimi poiriá descréisser ? Los que tomban dins la criminalitat, plan sovent, an pas res trobat mai per quitar la misèria e la frustracion. Cada còp qu'òm barra una escòla o una fabrega, òm deu dobrir una preson. Aquí ne sèm. La flicalha es pas la solucion. Pas sonque.

  • 2
  • 0
Picacho Pica pica ciutat
2.

Es perqué "Dins lo sud son totei lei memes ? De gents impulsius e incapables de se governar de per elei" ?

Per aquelei dires qu'ai auvits mai d'un còup, la conclusion revendriá a dire : li fau lei fòrças armadas per li metre de plomb dins la tèsta a aqueu monde ? Pietadós.

  • 6
  • 0
Jacme Tolosa
1.

eth país deus provençaus èi un pauc complicat, mas peth complicat debuta a Besièrs !

  • 8
  • 7

Escriu un comentari sus aqueste article