Bandièra01 1180x150: Comuna de Tolosa

Actualitats

Russia acceptariá d’atacar Siria se se pròva l’usatge d’armas quimicas

Putin ditz que solament lo Conselh de Seguretat pòt autorizar l’atac militar. Lo Senat dels Estats Units sosten Obama

| Reuters
Lo president de Russia, Vladimir Putin, escarta pas de sosténer un atac militar en Siria s’es emparat per las Nacions Unidas e se i aguèsse de pròvas objectivas que lo govèrn de Bashshar Al Asad a emplegat d’armas quimicas. Aquò es çò que diguèt en una entrevista a Associated Press; ça que la Putin a qualificat de ridicula la teoria que lo govèrn sirian empleguèsse d’armas quimicas.
 
“Dempuèi lo nòstre vejaire, es absoludament absurde que las fòrças armadas regularas, que se tròban en plena ofensiva e que dins qualques zònas an secutat los rebèls, ajan començat d’emplegar d’armas quimicas enebidas quand sabon fòrça ben qu’aquò serviriá de pretèxt per aplicar de sancions e l’usatge de la fòrça”, çò diguèt Putin. Pasmens, diguèt que se i aguèsse qualque donada que constatèsse l’usatge d’armas quimicas de la part de las fòrças armadas, escartariá pas de sosténer un atac militar en Siria. Aquelas pròvas deurián èsser “convencentas” e presentadas al Conselh de Seguretat de l’ÒNU, que segon son vejaire es lo sol que pòt autorizar l’usatge de la fòrça militara contra un país sobeiran.
 
Mentretant, lo Comitat de las Relacions Exterioras del Senat dels Estats Units s’es mes d’acòrdi per autorizar lo govèrn de Barack Obama d’atacar militarament en Siria. Segon The Washington Post, lo grop legislatiu a redigit un esbòs qu’autoriza lo govèrn d’emplegar la fòrça militara contra lo govèrn d’Al Asad. L’atac se limitariá a un maxim de 90 jorns, amb un periòde inicial de 60 jorns, prorrogable de 30 jorns de mai amb una nòva autorizacion del Congrès. Lo document enebís tanben lo desplegament de tropas dins lo territòri sirian, malgrat que considère ben l’enviament d’una “petita mission de salvament” pels cases d’emergéncia.
 
Lo tèxt s’es pachat après qu’Obama a recebut lo sosten dels principals dirigents republicans.
 
De son costat, lo Ministèri de la Defensa de França a presentat qualques vidèos amators per demostrar l’emplec d’armas quimicas pel govèrn sirian contra la populacion civila. Los servicis secrets franceses asseguran qu’an d’enregistraments per satellit e d’autras pròvas qu’o demòstran.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

garric
1.

Enfumatge...

  • 0
  • 0

Escriu un comentari sus aqueste article