Bandièra01 1180x150: Comuna de Tolosa

Actualitats

Un monde XIII: lo segond torn es lançat!

Damian Blanch, dels Dracs catalans a Irlanda: la meteissa nhaca
Damian Blanch, dels Dracs catalans a Irlanda: la meteissa nhaca
La partida França-Nòva Zelanda d’aqueste divendres dobrissiá la tièra dels rescontres del segond torn: sèt partidas espandidas sus cinc jorns. Doas son al programa aqueste dissabte: pas mai de bilheta en venda a Huddersfield per l’afrontament angloirlandés (15h30). En serada (21h), l’autre rescontre de la pola A veirà Austràlia fàcia a sos vesins fijians.
 
Doas autras partidas deman dimenge: Galas-Estats Units a Wrexham (15h) e Escòcia-Itàlia a Workington (17 h).
 
Diluns, es amb interès e l’espèr d’una victòria dels samoans que los sostens dels Blaus seguiràn lor confrontacion amb Papoa-Nòva Guinèa diluns a Hull (21 h). Dimars, la partida crosada pola C / pola D entre Tònga e Illas Cook metrà un tèrme a aquesta nòva tièra de sèt rescontres.
 
Tres mots de mai sus la partida d’aqueste vèspre a Huddersfield, dins l’Estadi dels Gigants. Una partida dins cunte espòrt que siague entre Anglatèrra e Irlanda joslèva unes remembres que son plan mai que d’espòrt. De segur, cal parlar del Dimenge Sagnós del 21 de novembre de 1920, del temps de la Guèrra d’Independéncia Irlandesa, quand las tropas britanicas tirèron sus la fola amassada dins l’estadi per veire una partida de fotbòl gaelic al Croke Park de Dublin-Baile Átha Cliath.
 
Los rugbis son tanben lo luòc ont l’esquipa d’Irlanda representa tota l’illa. Pendent d’ans, se jogava pas d’imne per aquela rason. L’espelida de la Rugby League sus l’illa verda comencèt vertadièrament en 1989 amb la creacion de l’esquipa dels Dublin Blues. La primièra partida internacionala jogada per Irlanda se debanèt a Washington per la Sant Patric de 1995 (victòria 24-22 suls Estats Units). Irlanda prenguèt part a la Copa del Monde de 2000 ont ganhèt contra Escòcia, Samoa e los maòris abans de pèrdre en quart per Anglatèrra 26-16. En 2008, los fijians los privèron (30-14) de la qualificacion per la mièja finala.
 
Dins l’esquipa, qu’a pres per escais lo de Wolfhounds (los Cans-Lops!), trapam a l’ala lo Damian Blanch que portava aquesta sason encara lo malhòt dels Dracs catalans. Nòu autres jogaires evoluisson en Superliga (cinc als Lops de Warrington) e cinc en NRL. Los autres son dins d’esquipas del Championship anglés. Cap fa part de las vint esquipas que disputan lo campionat d’estiu irlandés.




Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
1.

Bon :
NZ : 48 - Blaus : 0.
Los comentaris dins Lo Jornalet de dimenge de matin !

  • 2
  • 0

Escriu un comentari sus aqueste article