Bandièra01 1180x150: Comuna de Tolosa

Actualitats

L’universitat Montpelhièr 3-Pau Valèri blocada pels estudiants en luta

Del mes d’octòbre ençà, un movement estudiant de contestacion s’es organizat a la facultat de letras del Clapàs (Universitat Montpelhièr 3-Pau Valèri). Desempuèi lo dimècres 6 de novembre, es estada blocada e los corses son estats interromputs.
 
Los estudiants s’opausan a las mesuras d’austeritat de previstas per portar remèdi al deficit de 3,6 milions d’èuros dins lo budget de l’annada esclorara 2014-2015. Lo deficit es pas degut a un problèma intèrne, coma o mòstra l’edicte del ministèri e o comunica la presidéncia de l’universitat. Garatz aicí qualques unas de las mesuras per l’an que ven: la reduccion dels efectius estudiants pel tiratge al sòrt dels candidats a l’intrada en primièra annada, la tampadura del sit universitari de Besièrs, la reduccion dels efectius del personal, la supression de certanas filièras coma l’ensenhament del francés als estudiants estrangièrs, e d’autras.
 
Çò que se passa aicí resulta de la politica de desengatjament economic de l’estat dins l’ensenhament superior, menada desempuèi de temps. En 1999, lo procès de Bolonha a impausat a las universitats europèas de nòrmas de rendabilitat e de competitivitat. En França, çò darrièr dins aquel sens es la lei de la ministra Fioraso, dins la continuitat de la lei LRU (libertat e responsabilitat de las universitats) del governament precedent. L’objectiu es l’aplicacion d’un foncionament managerial a las universitats, a l’imatge del d’una entrepresa. D’ara enlà las facultats se pòdon pas pus permetre de faire de deficit. Dins aquesta logica, las inegalitats de finançament dins l’ensenhament superior se van agravar, van destacar de pòls universitaris pus importants e prestigioses que d’autres e totes seràn en concurréncia. Seràn favorizadas pas que las filièras mai interessantas per las grandas entrepresas.
 
Ara, los estudiants que devon trapar una sortida professionala a sos estudis van deure aquerir de competéncias utilizablas, emplegablas per las entrepresas. L’universitat vendrà solament un luòc de formacion professionala, non pas per faiçonar d’esperits critics, mas per faiçonar de salariats de bon manejar. A l’ora d’ara certanas universitats an ja de filièras de finançadas per de gròssas entrepresas (Montpelhièr 2).
 
A Pau Valèri los estudiants accèptan pas aquela reforma e s’organizan per lutar. La mobilizacion comencèt a la fin de setembre amb l’e-mail de la presidéncia de la facultat, enviat a l’ensemble dels estudiants e dels personals, per los avisar de las mesuras budgetàrias que serián votadas en decembre per l’annada 2014-2015. Las primièras assembladas generalas foguèron organizadas, atal coma de manifestacions a Montpelhièr, amb lo sosten de mai d’una organizacion sindicala. La darrièra assemblada generala, lo dimècres 9, votèt la cauma a travèrs del blocatge dels corses una setmana de temps. Lo blocatge a permés d’organizar d’accions, d’informar los estudiants, los liceans e los autres montpelhierencs, e fin finala de descunhar la situacion puèi qu’ara la ministra Fioraso se’n preocupa de bon.
 
Aquel movement a tanben permés de tornar dinamizar de lutas localas coma la dels salariats de Sanofi, e espèra entraïnar las autras facultats francesas, tanben ja en mobilizacion, que subisson las mesmas mesuras. Espèra, pus amplament, contribuir a aviar una revòlta contra las mesuras d’austeritat que tòcan tota la populacion.
 
Un apèl a una jornada de mobilizacion universitària, al nivèl nacional, es estat lançat pel dijòus 14.
 
 
 
Estudiants de l’UM3 en luta.
 
_____
Mai d’informacion sul deficit budgetari
La peticion lançada.
La pagina de la mobilizacion suls rets socials.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gerard Joan Barceló Pèiralata
12.

#10 Es una amalgama d'assimilar antidreyfusisme e antisemitisme. Pau Valèri faguèt l'elògi funèbre del filososòf josieu Henri Bergson en 1941 que se considèra encara un acte de resisténcia. Ne perdèt sa foncion de secretari de l'Acadèmia francesa.

  • 1
  • 0
Florian Paris
11.

#4 Aquela bandièra es una mescla de la bandièra comunista-libertari (roge e negre) e de la bandiera occitana ;)

  • 2
  • 0
Pirolet
10.

#5 Benlèu qu'èra d'ascendécia còrsa. Benlèu se poiriá escriure a la proveçala. Tanben èra antisemit (contra Dreyfús) coma un molon de gents de l'epòca. Anem, li podem daissar son nom tal coma es.

  • 2
  • 0
Ernèst Guevara Jr. L'Avana
9.

Aiceste combat es plan mai que lo dels solets estudiants de Monteplhièr ! Es un combat de republica sociala contra empèri financiarista internacional ! Qué vòl dire, aquò, una universitat "rentabla" ? Una universitat produsís pas de mercandesas, mas ensenha d'especialitats intellectutalas, e fòrma donc d'ensenhants, de cercaires, de pensaires, de creators de tota mena. Deficitària, una universitat ? Aquò vòl pas dire qu'una causa : las recèptas publicas bvastan pas, e cal tornar préner man sul mitan financièr internacional per poder cobrar çò que permet al pòble de se gobernanr el meteis mai que de se deure remetre als rapaces arrapats, egoïstas e psicopats de la finança internacionala. Totes sèm concernits.

  • 7
  • 0
BOURDON Pau
8.

#5 Òh, tres vòtes contra ! Be son hèra senticós los lectors d'aqueth article. Ua simpla PETITA observacion que'us desagrada. Praubòts !

  • 5
  • 4

Escriu un comentari sus aqueste article