Bandièra01 1180x150: Comuna de Tolosa

Actualitats

Un Monde XIII: los Kiwis tornar?

Lo rescontre Nòva Zelanda-Anglatèrra serà la primièra de las mièjas finalas que se jogarà dissabte de vèspre a Wembley. Una partida de tria entre lo tenent de la Copa e l’organizaire de la competicion.
 
Los bookmakers plaçan los neozelandeses darrèr australians e angleses. Mas dempuèi un mes, a nòstre vejaire, los Negres an fait mai pròva de mestresa e de dinamisme que los angleses que lor i demòra de se sublimar per considerar de ganhar “sa” Copa.
 
Se parla totjorn fòrça del Sonny Bill Williams, mas es totjorn amb dotze collègas sus la pelena que son de granda qualitat, amb un parelh de mièges de primièra borra per animar lo jòc: lo dobertura Kieran Foran e lo mesclanha Shaun Johnson, sens doblidar lo farfadet-talonaire Isaac Luke. E quand la pauma arriba a las alas, la rega blanca es pas luènh: ja 6 ensags de marcats per Roger Tuivasa-Scheck e 4 per Manu Vatuvei. En fàcia, i aurà lo Ryan Hall en cap del classament dels marcaires amb 8 ensags.
 
Quand se pensa a la Nòva Zelanda, per d’unes es l’esquipa dels All Blacks que ven en primièr pel cap. Calguèt un procès en 1926 entre la Rugby Union e la Rugby League per saupre quala esquipa nacionala podiá utilizar lo tèrme. Los XV lo ganhèron e los XIII causiguèron de se metre lo Kiwi sul còr. La victòria en Campionat del Monde de 2008 a confirmat la passion del pòble neozelandés pel XIII. En 2011, i agèt mai de telespectators per seguir un Nòva Zelanda contra Anglatèrra (primièra audiéncia esportiva de l’an) del XIII qu’un Wallabies-All Blacks. En 2012, Los Warriors emplenèron mai lor estadi (melhora chifra: 18 021 espectators) que los Auckland Blues (15 136).
 
Pendent la Copa del Monde dels XV de 2011, los grands ecrans meses dins las vilas retransmetián tanben lo percors dels New Zeland Warriors en NRL. Aquò manquèt de crear un incident diplomatic amb l’Africa del Sud. Aprèp la mièja finala All Blacks-Springboks, los neozelandeses se presentèron pas a la conferéncia de premsa programada: en sortir dels vestiaris, s’èran installats dirèctament davant la television per seguir los Warriors en finala d’NRL (que perdèron: 10-24 fàcia a Manly)! La formacion, franquesa de l’NRL dempuèi 1995, fornís 7 dels 24 seleccionats.
 
Aqueste dissabte sus la pelena de l’estadi mitic londinenc, Blancs contra Negres, serà mai apassionant qu’una partida d’escacs! Probable que los perdents seràn embarrats dins la Torre de Londres alara que los venceires auràn encara de camin de faire per venir Reis del costat de Manchester!
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Escriu un comentari sus aqueste article