Bandièra01 1180x150: Comuna de Tolosa

Actualitats

Es mòrt lo cineasta niçard Georges Lautner, emblèma del cinèma popular

Lautner en 2010 a Canas
Lautner en 2010 a Canas | Olivier Strecker
Lo director de cinèma niçard Georges Lautner, conegut per aver dirigit Jean-Paul Belmondo dins Le Professionnel o pel succès de Les Tontons Flingueurs, moriguèt divendres passat a París, dins sos 87 ans.
 
“Lo sieu cinèma foguèt un modèl de cinèma popular, que de generacions de franceses coneisson e redescobrisson totjorn amb satisfaccion perque es prigondament ancorat dins lo nòstre patrimòni cinematografic”, çò declarèt lo primièr ministre francés, Jean-Marc Ayrault, dins un comunicat oficial.
 
Lautner nasquèt a Niça en 1926, filh del joielièr e aviator austrian Leopold Lautner e de l’actritz solelhenca Renée Saint-Cyr.  Comencèt sa carrièra en 1945, après la Segonda Guèrra Mondiala, coma decoraire dins lo filme La Route du Bagne. Contunhèt sa carrièra dins lo mond cinematografic en essent assistent de direccion, fins qu’en 1958 dirigiguèt La Môme aux Boutons, una revirada comerciala. Mas en 1961, Le Monocle Noir foguèt ja una reüssida demest lo public.
 
Amb la parodia de filme policièr Les Tontons Flingueurs, amb Lino Ventura, Bernard Blier, Jean Lefebvre e Francis Blanche, Lautner venguèt un classic del cinèma francés.
 
En 1968 dirigiguèt Le Pacha, amb Jean Gabin, e a la fin del decenni dels ans 1970 comencèt una collaboracion estrecha amb Belmondo, que lo dirigiguèt dins de filmes coma Flicou Voyou, Le Guignolo e Le Professionnel, una capitada categorica de l’an 1981, que compta amb la musica d’Ennio Morricone.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gerard Joan Barceló Pèiralata
1.

Ieu sabiái pas brica que Georges Lautner èra occitan. Es un dels meritis de Jornalet: nos permetre de recuperar la fiertat de tot çò qu'Occitània produtz!

  • 1
  • 0

Escriu un comentari sus aqueste article