Bandièra01 1180x150: Comuna de Tolosa

Actualitats

Rugbi XIII: un campionat un pauc fòl

Las primièras jornadas vertadièrament ivernalas del Campionat d’Elèit de XIII se dobriguèron dissabte de vèspre sus una brava suspresa: Tolosa, fòrta de sa victòria a Lesinhan e del gròs succès passat a Carcassona, coneguèt la desfaita cò del darrièr actual de la classa: Avinhon (29-22). L’internacional Tòni Gigòt i es per quicòm: tres còps de pè a seguir seus s’acabèron en ensags pels Blaus e Blancs e ajustèt un tombat decisiu.
 
Carcassona recebiá Vilanuèva a Domèc. Gressèque ensacava una penalitat (11a), puèi al ras del tengut, enfumava la defensa verda e blanca per puntar un ensag que transformava (17a). Aprèp mièja orada de jòc (33a), l’internacional Ionès Khattabi concretizava una longa ataca dels Canaris e dos còps de pè a seguir: amb la transformacion de Gressèque, la marca èra de 12-0 a la pausa. A la represa, l’alièr dels Laupards perdiá la pauma en cabussant dins l’enbut! Gressèque ajustava una penalitat (55a). Albèrt ne passava una (69a) que permetiá als aquitans de beneficiar del bònus defensiu que perdián sus la darrièra ataca dels locals (79a) que mandava Anderson darrèr la linha e la transformacion entre los pals: 20-2. L’esquipa de Carcassona se torna plaçar dins la corsa per la Pola dels Asses, mas se trapa confrontada a un brave problèma d’efectius vist lo nombre de nafrats . S’i ajusta lo jove alièr Grosson que, per sa primièra partida al naut nivèl, daissèt sos collègas al cap d’una oreta, tocat al ginolh. Lo papó anonciat vendrà pas: operacion del menisc aprèp un còp reçauput a la Copa del Monde.
 
Dimenge, alara qu’a Sant Estève, los Dragonets ganhavan dins la confrontacion catalana fàcia a una formacion plan valenta de Palau 34-26, a l’estadi del Molin, l’FCL recebiá lo cap de fila limosenc. Cada esquipa agèt son temps de dominacion e profeitèt de las decas de l’adversari per marcar. Lo centre limosenc Peacock se distinguiguèt dins l’exercici: dins lo primièr temps, ensag sus una pauma nauta non contrarotlada per l’alièr local; dins lo segond temps, aplatussèt al limit de l’enbut una pauma que dos lesinhaneses gaitavan sortir en balon mòrt! Los limosencs beneficièron tanben d’un ensag de penalitat. La victòria metèt un brave moment a causir son camp. A la pausa, Lesinhan menava 8-6 e èra davant encara a dètz minutas de la fin: 22-18. Francés Theresin metèt las doas esquipas a egalitat e una darrièra ataca limosenca amb un ensag en cap de linha de Bastian Almarcha balhèt la victòria als Roges e Negres: 26-22.
 
Al programa de dimenge qu’arriba: en cap d’aficha, lo dèrbi entre Limós e Carcassona a L’Agulha, mas tanben un Tolosa-Dragonets que promet. Lesinhan se mesfisarà del nhac de Palau e Vilanuèva reçauprà Avinhon.
 
Lo 3n torn de la Copa de França permetrà de conéisser las 8 esquipas que jogaràn los oitens de finala amb las esquipas d’Elèit la dimenjada dels 11 e 12 de genièr. Lo tiratge al sòrt de las partidas se farà diluns 16 a Perpinhan, de la man de l’ancian internacional dels XV, Imbernon. La Federacion a fixat lo debanament de la finala de la Copa per la dimenjada dels 12 e 13 d’abril a Carcassona.
 

Rebombs de pauma
 
— Lectura. Unes tròces del libre de Frederic Vouland, La partida clandestina / Le match clandestin, seràn legits aqueste divendres 13 al restaurant lo 37 (37, carrièra Trivala) a Carcassona, sul còp de 6h e mièja del vèspre. Possibilitat de manjar amassa apuèi (20h, 20 èuros, sus reservacion: +33 (0)4 68 25 19 78 o ieo11(a)ieo-oc.org)
 
— Felicitacions. Lo Parlament britanic a votat una mocion per saludar lo bon debanament de la Copa del Monde dels XIII.
 
Imatges de la finala.
 
Lo reportatge de BeIn Sport suls Blaus a la Copa del Monde.
 
— Tolosenc. Anonciat en Superliga, l’internacional fijian Eloni Vunakrece clavarà fin finala sa sason jos las colors del Tolosa Olimpic.
 
— Arribat. L’alièr Ben Pomeroy es arribat en tèrra catalana e a pres part als entraïnaments dels Dracs.
 
— Presents de Nadal. Las botigas dels Dracs a Perpinhan (Brutus, Lafayette) seràn dobèrtas lo dimenge 15 e lo dimenge 22 de decembre.
 
— Calendièr 2014. Se coneis ara lo calendièr dels Dracs per la sason 2014.
 
— L’NRL ven tanben de revelar las datas de sa competicion per l’an venent.
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Eric Arbanats 33
2.

Max Rousié... De Vilanuèva d'Out, l'eròi omnipresent de La partida clandestina !

  • 1
  • 0
Alan Roch Carcassona
1.

Una peticion per la difusion del XIII sul servici public :
http://www.avaaz.org/fr/petition/FRANCE_TELEVISION_Obtenir_la_diffusions_de_matchs_de_Rugby_a_13_Francais/?tvwvsgb

  • 5
  • 0

Escriu un comentari sus aqueste article