Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcLengadòc BasCarcassés

An atacat una escòla mairala de Carcassona amb un coctèl Molotov

| Google Maps
Lancèron un coctèl Molotov a l’escòla mairala Paul-Lacombe a Carcassona dimècres passat, segon çò que raportava La Dépêche.
 
L’atemptat trenquèt lo veire d’una fenèstra e causèt de degalhs dins una cambra: un lièch es completament destruch e dos autres son inutilizables. Las coberturas cremadas e las parets ennegresidas fan que la cambra la cal refar. A l’ora d’ara i a pas d’avaloracion economica dels damatges. Pasmens, la comuna de Carcassona a fach sa denóncia per degradacion de bens publics.
 
La polícia a dobèrt una enquèsta, que se prevei complicada pr’amor que i a pauques indicis. Totun, se poiriá pensar que los autors d’aquel atac serián intrats dins la cort per lançar l’objècte incendiari sus l’escòla, compte tengut de la distància entre la fenèstra e la carrièra.
 
Dins son informacion, La Dépêche parla tanben de l’estat d’alarma dins totas las escòlas de Carcassona e de la desolacion de la comuna: “las escòlas son de santuaris. Los luòcs de l’educacion e de la cultura devon èsser sagrats. En tot cas fasèm tot per que los petits pòscan èsser aculhits dins las meteissas condicions que d’abitud e que sián pas perturbats”, çò declarèt Laury Sant-Martin, adjoncha al cònsol encargada de l’educacion. Diluns, jorn de la rintrada, totes los trabalhs de netejament e reabilitacion seràn alestits.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pèire Cardenal Jr. Velai
1.

Los maufatans, sens fe ni lei!

  • 1
  • 0

Escriu un comentari sus aqueste article