Bandièra01 1180x150: Comuna de Tolosa

Actualitats

Rugbi XIII: Limós, Tolosa, Dragonets e Lesinhan dins la pola bèla

Las Aglas de Sheffield desfisaràn los Grizzlis de Limós aqueste dissbate 1r de febrièr de vèspre a l'Agulha
Las Aglas de Sheffield desfisaràn los Grizzlis de Limós aqueste dissbate 1r de febrièr de vèspre a l'Agulha | Sheffield Eagles
La darrièra jornada de la primièra fasa del campionat Elèit de XIII a levat la darrièra incertitud que demorava sul debanament del segond torn. Dissabte, del temps que Tolosa batiá logicament Palau 24-12, Lesinhan s’assegurava definitivament la quatrena plaça, sinonim de participacion a la pola bèla, en anant prene lo punt del bònus defensiu a Avinhon: 16-22. Aquò rendiá inutila la victòria, mercé a un tombat de Gressèque, de Carcassona a Brutus fàcia als Dragonets 17-16. E òc, un seten punt de bònus defensiu permet als Verds e Blancs d’èsser davant Carcassona que ne ramosèt qu’un sol dempuèi la debuta de la sason.
 
E dimenge, en ganhant 24-16 fàcia al cap de fila Limós, los Laupards de Vilanuèva passavan Carcassona per la cinquena plaça, mercé elis tanben als 5 punts de bònus defensiu ramosats.
 
Aprèp una dimenjada de pausa, Limós, Tolosa, Dragonets e Lesinhan dintraràn en confrontacion per obténer la qualificacion dirècta per las mièjas finalas (pola A). Las polas B e C ramosaràn caduna doas esquipas d’Elèit 1 e doas d’Elèit 2. Enjòc: èsser la melhora esquipa d’Elèit 1 de son grop per jogar lo primièr torn de barratge a domicili. Atal, jogaràn en pola B: Vilanuèva, Palau, Realmont e Baó. E, en pola C, traparem Carcassona, Avinhon, Albi e Lion. Primièra dimenjada: los 8 e 9 de febrièr.
 
Dissabte, los Dracs joguèron lor primièra partida amicala amb la recepcion dels Broncos de Londres. Presentèron una esquipa ont mancavan fòrça titulars, çò que permetèt a unes Dragonets de venir Dracs e s’acontentèron d’una victòria estequida 16-12.
 
Novèla partida amicala, totjorn a Brutus e a cinc oras del vèspre, aqueste dissabte 1r de febrièr amb la recepcion de Widnes. Dissabte de vèspre, autra partida de gala a Limós amb un rescontre entre la formacion locala e l’esquipa de Championship, una plaça fòrta del XIII en Anglatèrra: las Aglas de Sheffield.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Caracssona
1.

Tiratge al sòrt dels quarts de finala de la Copa de França (partidas lo 22 o lo 23 de febrièr) :
Vilagalhenc (Nacionala 1)-Palau
Lion (Elèit 2) - Carcassona
Tolosa-Dragonets
Revenge de la finala de 2013 : Avinhon-Limós

  • 2
  • 0

Escriu un comentari sus aqueste article