Bandièra01 1180x150: Comuna de Tolosa

Actualitats

Un naviri marchand s’es partit en dos tròces en Anglet

| Rubén Sardiña
Un naviri marchand, nomenat Luno e fabricat en Biscaia (Bascoat), se partiguèt en dos tròces après après s’encalar a la còsta d’Anglet (Bas Ador). Segon d’informacions de Sud-Ouest, lo vaissèl foguèt empench contra las ròcas al bocal d’Ador.
 
Segon çò qu’expliquèt als mèdias lo capitani del vaissèl, Lunel Delort, lo naviri, que portava pas de carga e que veniá del pòrt de Bilbao, lancèt un messatge de secors al pòrt de Baiona per “una pana electrica totala”. Mas en ensajar d’intrar dins lo pòrt, lo Luno foguèt emportat pel vent fòrt contra lo dòc sud e lai se partiguèt.
 
Los marinièrs foguèron evacuats sul pic pels secorses, del temps que los curioses acampats sus la plaja aplaudissián. Del costat uman solament cal plànher un ferit, mentre que del costat environamental s’estima un damatge leugièr perque los depauses de fiol èran practicament vuèges. Pasmens, s’es lançat lo plan Polmar que lucha contra las pollucions marinas.
 
La tempèsta Petra a secodut la còsta de Gasconha dempuèi la nuèch de dimars amb de vents qu’an despassat los 150 quilomètres ora. Aquela tempèsta a provocat de damatges grèus mai que mai en Bretanha.
 
Lo jornal Sud-Ouest a fach un seguiment informatiu de l’accident. Cal soslinhar tanben las informacions que lo cònsol d’Anglet, Jean Espilondo, a publicadas sus Twitter

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pimflòid
5.

#3 Si per cas n'ac saps pas, qu'ei un jornal participatiu qui leges.
Donc arrés ne t'empaisha pas de parlar de çò qui's passa a vòste. Que i a un onglet "manda-nos una nòva" sus la paja d'arcuèlh qui ei hèit entà aquò.

  • 1
  • 0
pimflòid
4.

#2 E ben òsca enquèra mei si n'ei pas lo purmèr còp!

  • 1
  • 0
Enric Baiona gasconha
3.

En mei de s'actualizar, Lo Jornalet que poderé parlar de la còsta de Gasconha e pas sonque de la còsta d'anglet com hicar Baiona sus la mapa de la meteo !

  • 2
  • 1
Occitan Heavy
2.

#1 Es pas lo primièr còp que 'Jornalet' s'actualiza pendent lo dia. Arribèt ja dins lo passat.

  • 2
  • 0
Pimflòid
1.

Hòu!!!

Purmèra "mesa a jorn" deu jornalet en cors de jornada!

Òsca!

  • 4
  • 2

Escriu un comentari sus aqueste article