Bandièra01 1180x150: Comuna de Tolosa

Actualitats

"Indisponibilitat subita" per l'ensenhament de l'occitan a Montpelhièr

Lo CREO Lengadòc seguís mobilisat contra lo desmantelament de l'occitan dins l'ensenhament

| Guilhèm Sevilla

País Nòstre e lo Med'Òc avián apelat a un recampament uèi contra lo desmantelament de l'occitan dins l'ensenhament. “Dijòus 31 de mai deu acampar lo Conselh Academic e serà lo moment de manifestar”, çò disiá l'apel. Lo Conselh Academic de las Lengas Regionalas deviá ensajar de resòlvre lo conflicte amb los ensenhaires d'occitan. Ça que la, un brèu messatge mandat ièr a 18h als participants d'aquel acamp causèt l'estonament. Lo messatge disiá que la reünion èra estada anullada "per causa d'indisponibilitat subita" del director academic encargat del dossièr "lenga regionala".


Sens especificar quina era aquela "indisponibilitat subita", lo CREO Lengadòc pensa que lo director a evitat una confrontacion que s'anonciava musclada, vista l'indignacion dels occitanofòns per rapòrt a la siá politica de desmantelament de la nòstra lenga dins l'academia de Montpelhièr. Al delà se pòt pas parlar d'interès per resòlvre lo conflicte.
 
Pasmens, cal esperar qu'aquel Conselh Academic se debanarà qualque jorn. S'aquel moment arriba e lo director academic es tornarmai sobtadament indisponible, lo CREO demanda que lo rector n'assumisca lo ròtle per respondre las revindicacions dels Conselh Academic de las Lengas Regionalas".
 
Lo CREO Lengadòc seguís mobilisat e apela los colègas, los parents d'escolans, los elegits, los sindicalistas, e lo pòble en general a signar e far signar massivament la peticion.
 
Las mobilizacions son en responsa a las mesuras qu'a anonciat l'acadèmia de Montpehièr quant a l'ensenhament de l'occitan.

Demest aquelas mesuras se parla de la supression d’un emplec a miei temps d’animacion pedagogica, en foncionant dempuèi 1982, suls mejans especifics atribuits pel ministèri pel desvolopament especific de las lengas regionalas.

S'agís d'un pòste que permetiá de metre en marcha los projèctes pedagogics del primièr e del segond gra, amb l’ajuda de las collectivitats territorialas.

Al delà, se pretén redusir considerablament la mejana d'accion de l'encargat de mission academica e las siás foncions de responsabilitat, mai que mai sus las gestion dels mejans e la seguida dels ensenhaments. Son tanplan menaçats los pòstes dels conselhièrs pedagogics dels departaments d'Aude e de Gard, vist qu'après la lor retirada seràn pas remplaçats.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Remenet Leujac
6.

Cal contunhar de quichar pel tal qu'aquela "indisponibilitat subita" venga definitiva : l'amira es de far petar lo Rector, que lo paure "encargat" i es pas per res, a mon vejaire.
Reviscolarà un còp aquel marrit Monsur partit e lo CALR se tendrà normalament ; a Tolosa, es totjorn lo Rector que lo presida.

  • 2
  • 0
garric
5.

Quand mèsma, los Occitanistas qu'espaurugan l'administracion, es un brave progrès, non ? Començan d'i soscar abans que de tocar a l'ensenhament de l'Occitan.

  • 7
  • 0
BOURDON Auloron
4.

#3 Ua estructura occitana, metem; mes entant qui aquera administracion e dauneja lo país, qué cau har ? Ací que s'ageish de parlar de l'ensenhament de l'occitan en L-R, dab qui se n'i va parlar senon dab era ?

  • 2
  • 2
Faidit Comuns
3.

Pròva, se ne caliá donar una, que l'administracion estatala francesa servís per pas res en Occitània. Pièger: es una estructura toxica per lo País Nòstre.

Es una administracion de colonizaires, facha per desvolopar los interesses dels colons al detriment del pòble occitan.

Mas, bon, d'unes diràn encara que l'idèa de l'independència occitana es un replegament. Creson encara que França cambiarà: 9 sègles e pro long per comprendre a mon vejaire...

  • 3
  • 0
garric
2.

"indisponibilitat subita" ? Aviá benlèu la caganha, lo tipe...

  • 9
  • 0

Escriu un comentari sus aqueste article