Bandièra01 1180x150: Comuna de Tolosa

Actualitats

La Republica Centreafricana es a mand d’èsser vuèja de musulmans

Una femna musulmana de 25 ans es protegida per de catolics a Bossemptele, après que la milícia antibalaka tuèsse son paire, son marit e mai de 80 musulmans de la vila
Una femna musulmana de 25 ans es protegida per de catolics a Bossemptele, après que la milícia antibalaka tuèsse son paire, son marit e mai de 80 musulmans de la vila | 2014 Peter Bouckaert/Human Rights Watch
D’associacions pels dreches umans coma l’Associacion pels Pòbles Menaçats, Amnestia Internacionala, Human Rights Watch e Mètges sens Frontièras an avertit tornarmai que la comunautat musulmana de Centreafrica es en risc real de desaparéisser. Segon d’informacions de Nationalia, aquelas associacions afirman que l’intervencion francesa capita pas de protegir las populacions en perilh. D’observaires sul terren an dich que l’extermini religiós es mai que mai intens dins la zòna occidentala del país, ont se destrutz de quartièrs musulmans entièrs.
 
Segon lo Naut Comissariat de las Nacions Unidas pels Refugiats (NACNUR), 20% dels centreafricans an quitat lor ostal. A la fin de 2012 avián fugit 255 000 centreafricans. A l’ora d’ara son 990 000 los fugitius, dont 700 000 son desplaçats dins la Republica Centreafricana e 290 000 son de refugiats dins d’autres païses. Las condicions de totes aqueles desplaçats son inumanas amb de malautiás, una manca d’aiga potabla e una manca de luòcs per dormir.
 
En març passat, la Seleka arribèt al poder après un còp d’estat contra lo president François Bozizé. La Seleka (“aliança” en lenga sango), oficialament nomenada Seleka CPSK-CPJP-UFDR, es un agropament de milícias amassadas per reversar lo govèrn del país. Sos membres son musulmans dins un país de majoritat crestiana.
 
Sul pic apareguèron de milícias formadas per luchar contra la Seleka, nomenadas antibalaka, qu’a l’ora d’ara son responsablas del netejatge religiós e de las violéncias contra los musulmans, en cercant de se venjar dels atacs que patiguèron arunan.
 
Al delà de l’intervencion de França dins lo conflicte, Nationalia soslinha la poderosa influéncia de Chad, que lo president d’aquel país, Idriss Déby, ajudèt l’èx-president centreafrican François Bozizé a prene lo poder en 2003, e que puèi li retirèt lo sosten e lo daissèt tombar davant la Seleka. A l’ora d’ara Déby es partisan de començar una “transicion” que “desboque vèrs d’eleccions”. De fach, segon las informacions publicadas pel jornal catalan, e après consultar de cercaires sus plaça, lo president chadian cèrca de contunhar son influéncia per contrarotlar la frontièra amb Còngo e per evitar qu’aquel conflicte intre dins son país, qu’a d’estructuras etnicas e religiosas fòrça similaras.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gerard Joan Barceló Pèiralata
4.

Siáu crestian evangelic, mai me senti pròche dei musulmans secutats, non pas dei pseudocrestians que tuan e secutan., perque, per ieu, èsser crestian es seguir Jèsus-Crist, e sei soleis armas foguèron aquelei de la fe e de l'amor. Se, coma o cresi, Dieu es amor, avèm d'obrar per la patz entre totei leis òmes, quinei que sigan lei cresenças o noncresenças: per ieu, cau saludar l'actitud dei catolics de la fòto que protegisson aquela paura dòna, e lucharai totjorn per la convivéncia.

  • 1
  • 1
Castel Mathieu Marselha
3.

#1
L'indignacion a pas d'aguer d'escala. Se pòu pas mai tolerar çò que se fa a l'ora d'ara en Centrafrica que çò que se fasiá dau temps dei Selekas.
Cresètz qu'es pas possible de denonciar au còp lei dos integrismes ?

Fasètz çò que reprochatz en d'autres, en assajant d'excusar leis abominacions actualas que se debanan ailà.

"tot ço que ven de l'Islam es sistematicament minorat, banalizat e lo contrari montat en esplinga, de miliers de morts victimas dau fanatisma, au nigeria, en Iraq, en Siria de pertot dins lo mond e a la base la doctrina de Maomet"

Siatz la demostracion evidenta (e pas la soleta sus lo Jornalet) que non, tot çò que ven de l'Islam es pas sistematicament minorat ò banalizat. Alucatz un pauc la TV e agachatz BFMTV, escotatz de cronicaires coma Zemmour, qu'es luench d'èstre enebit dei platèus TV, legissètz Finkielkraut, le Figaro ò Valeurs Actuelles, anatz sus de sites coma Boulevard Voltaire ò Atlantico etc, etc... Vos rasseguri, siatz luench d'aguer una posicion originala.

  • 10
  • 6
Ebé
2.

#1 D'asiranças coma la vòstra son a far un genocidi, e vos o justificatz. Esperi que la vòstra malautiá tròbe lèu un remèdi, o l'umanitat sèm condemnats, sénher Pessamessa

  • 3
  • 4
lo seten cavalier de l'apocalipsi
1.

coma d'abitud, quand la SELEKA tuiavan, pilhavan, violavan e fasiàn fugir la majoritat crestiana dins la sèuva, s'entendià degun protestar. ara , li a una revirada quasiment normala , la venjança, un revertegot que se compren, mai segur non se pot justificar; te parlan ara d'exterminis religios, mais abans dau temps de la seleka victoriosa, de qu'èra, ço que sed passava ? un eucumenisme pacific ?
tot ço que ven de l'Islam es sistematicament minorat, banalizat e lo contrari montat en esplinga, de miliers de morts victimas dau fanatisma, au nigeria, en Iraq, en Siria de pertot dins lo mond e a la base la doctrina de Maomet

  • 12
  • 9

Escriu un comentari sus aqueste article