Jérôme Kerviel, lo trader breton qu’en 2008 faguèt tremolar la banca francesa Société Générale perque generèt d’enòrmas pèrdas —çò dison—, se liurèt aquesta dimenjada a la polícia francesa a Menton, après traversar la frontièra. Kerviel es condemnat a tres ans de preson e se deviá presentar a Menton abans mièjanuèch de dimenge. E mai s’aviá manifestat que refusava de se liurar quand èra dins lo territòri de l’estat italian, lo trader traversèt la frontièra francoitaliana qu’an mesa entre Ventemilha e Menton, ont dos policièrs de l’estat francés lo detenguèron.
 
Kerviel èra a Ventemilha (Ligúria) en tot arribar d’una marcha de protèsta que faguèt a pè dempuèi Roma pendent tres meses. Un còp près de la frontièra, lo trader assegurèt als mèdias que refusava de se liurar a la justícia francesa sens s’entrevistar abans amb lo president François Hollande. Kerviel voliá demandar a Hollande una “proteccion” per certans testimònis potencials, davant las “disfoncions del sistèma judiciari”. Hollande escotèt pas sa demanda, mas Kerviel se liurèt fin finala, davant la menaça d’un mandat de recèrca internacional.
 
L’avián condemnat a tres ans de preson per aver provocat 4,9 miliards d’èuros de pèrdas a la banca Société Générale, en tot amagar d’investiments marrits en de produches de risc. El se considèra la victima d’un sistèma que la banca emplegava per multiplicar son profièch: es una estrategia que capitèt mal e, alavetz, s’inculpèt Kerviel d’aquel malastre. “Soi pas colpable, me metrai pas de genolhs davant una decision injusta”, çò afirmèt lo trader.
 
E mai se la Cort Suprèma confirmèt la pena de tres ans de preson, l’entorn de Kerviel considèra qu’es pas possible qu’un simple trader aja pogut provocar aquelas pèrdas dins la banca sens que sos superiors remarquèsson pas res.