Bandièra01 1180x150: Comuna de Tolosa

Actualitats

Occitània acaba la Viva World Cup en cinquena posicion

| Seleccion Occitana de Fotbòl

La cinquena edicion de la Viva World Cup finalizèt amb la victòria de la seleccion anfitriona, Curdistan, que derrotèt la seleccion de Chipre del Nòrd per dos gòls a un. La seleccion de fotbòl del país nòstre, que poguèt pas jogar las semifinalas en demorar segonda del sieu grop, òc que faguèt plan de concurréncia per las autras posicions e acabèt lo torneg en una meritòria cinquena posicion. En total, nòu seleccions de nacions sens Estat an jogat aquel campionat que s’es celebrat dins lo Curdistan iraquian.


Lo balanç global indica que la seleccion occitana de fotbòl a jogat quatre partidas, que n'a ganhat tres e n’a perdut una. Los jogaires occitans an marcat 16 gòls e solament n’an recebut 4, un resultat que demòstra lo bon jòc qu'Occitània a exibit dins lo país asiatic. Urosament s’a pas disputat cap de partida entre la seleccion occitana e una curiosa seleccion provençala, qu'es demorada en quatrena posicion. Seriá estat malaisit de justificar una partida entre una seleccion nacionala e una equipa que representèsse una part d’aquel meteis país.
 
Lo classament final, per òrdre del ganhant al darrièr classificat, es: Curdistan, Chipre del Nòrd, Zanzibar, Provença, Occitània, lo Sahara Occidental, Tamil Eelam, Rètia e Darfur. Totes los partits foguèron emeses en dirècte per la television curda e, pel primièr còp, una equipa de Canal + se desplacèt amb la seleccion occitana per ne far de reportatges, çò que demòstra lo creissent interès mediatic per l’espòrt occitan.
 
Malgrat los evidents merits esportius dels curds per capitar la victòria, cal dire que la seleccion curda a comptat en tot moment amb un brave sosten del mond del país, qu'an emplit los estadis cada còp que jogave la lor equipa. E s'agís de terrens justament pichons. L’estadi Franso Hariri de la vila d’Erbil, ont se joguèc la finala, a una capacitat per 40_000 espectadors. Al delà, los jogaires locals èran mai abituats a las nautas temperaturas enregistradas, qu'arribavan als 40 gras a primièra ora del tantòst.
 
Defòra dels terrens esportius, pendent tot lo campionat se son fachas d'activitats culturalas parallelas e d'amassadas d'afrairament. Cal tanben soslinhar que los jogaires occitans recebèron cada jorn de corses de lenga occitana, perque èran a representar un país amb una istòria millenària. L’organizacion generala del campionat, a la carga del govèrn curd, es estat excellenta, segon an soslinhat de membres de las divèrsas delegacions. Ara solament cal esperar l’edicion seguenta de la Viva World Cup e qu'Occitània tòrne aver la capitada d’i mandar la nòstra esquipa nacionala.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Jordi
1.

Que voli brembar Frederic Nadau, membre de la selleccion e mort i a un an e mieg. Que soi content peus bons resultats de la selleccion Occitana e pr'amor sei que Fred, sii on sii, ei erós de véder com la soa equipa camina.
Òsca Occitània

  • 2
  • 0

Escriu un comentari sus aqueste article