Bandièra01 1180x150: Comuna de Tolosa

Actualitats

Rugbi XIII: los Dracs arriban pas a encadenar

L’an que ven, lo pilar dels Dracs Catalans, Miquèl Simon, portarà las colors dels Gats Fèrs de Wakefield
L’an que ven, lo pilar dels Dracs Catalans, Miquèl Simon, portarà las colors dels Gats Fèrs de Wakefield
Granda decepcion dissabte del costat de Brutus: los Dracs an pas fait lo pes fàcia a Wigan. L’esquipa se desorganizèt. Coneguèt lo costumièr daissar-anar de fin de mièg temps per veire passar, entre la 38a e la 40a minuta, la marca de 12-10 a 24-10 pels vesitaires. A la represa, l’arbitre sortissiá dos cartons jaunes (en plaça de la mesa sul rapòrt costumièra) per jòc dur dels Sang e Aur e Wigan ne profeitava per rajustar dos ensages: 36-10. La partida s’alanguiguèt amb just un tombat pels angleses e un ensag en cap de linha per Damian Cardace. Marca finala: 37-16 per Wigan. E tornar: tròp de fautas de man, pas de sosten al portaire de balon, un parelh de mièges sens pes sus l’organizacion del jòc... Se va caler ratrapar tre dissabte que ven amb la venguda de Wakefield per assegurar al pus lèu la qualificacion per las pelhòfas e per pas s’installar dins l’espirala negativa del dobte.
 
 
En Austràlia
 
La setmana tretzista se dobriguèt dimècres 9 amb lo tresen States of Origine a Brisbane. Los Granats de Queensland metèron un punt d’onor a ganhar la partida amb un brave escart: 32-8. Significavan atal als Blaus de la Nòva Galas del Sud qu’anèron prene moquets lo trofèu de l’an, que serián plan prèstes pel revenge de l’an que ven.
 
En NRL, la batèsta es terribla: aprèp 16 jornadas, tres esquipas son cap de fila: Manly, Prenrith e Canterbury amb 26 punts, 3 seguisson amb 22 punts, 5 an 20 punts e i a solament 8 plaças qualificativas per la fin de sason.
 
 
Los Dracs pescan l’anguiala
 
Mas pas dins l’Estanh de Bajas, puslèu del costat de Paramatta amb l’anonci de la signatura per las doas sasons venentas del centre internacional australian Willie Tonga. Per contra, lo pilar Miquèl Simon, en manca de temps de jòc a Perpinhan, ven d’anonciar sa signatura a Wakefield per las doas sasons venentas.
 
 
Calendièrs
 
La Federacion ven de comunicar lo calendièr de la primièra fasa del campionat d’Elèit per la sason 2014-15. Començarà la dimenjada del 14 de setembre amb las partidas Lesinhan-Dragonets, Palau-Carcassona, Tolosa-Limós e Vilanuèva-Avinhon.
 
Aquela primièra fasa s’acabarà per la dimenjada de l’11 de genièr. Se sap tanben que, dins l’encastre del Torneg Europèu, lo XIII de França anirà jogar en Irlanda (18 o 19 d’octobre) e en Escòcia (1r o 2 de novembre) e que reçauprà lo País de Galas a l’Estadi d’Albi lo dissabte 25 d’octobre.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
1.

Dos Dracs suspenduts :
http://www.lindependant.fr/2014/07/16/duport-et-mounis-n-y-coupent-pas,1907943.php

  • 0
  • 0

Escriu un comentari sus aqueste article