Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

Una camèra per seguir en dirècte Aubèrta, l’orsalhona perduda en Aran

| Conselh Generau d'Aran
Lo Conselh General d’Aran a mes una camèra per seguir en dirècte Aubèrta, l’orsalhona que trobèron perduda lo 17 d’abril passat a Aubèrt (Val d’Aran). Aubèrta a sièis meses e viu dins un domeni barrat de 5000 mètres cairats ont l’alimentan segon un protocòl internacional, per fin de garentir l’isolament de la bèstia a respècte de las personas, mentre qu’ela se prepara per son retorn a la vida salvatja. La camèra permet de susvelhar son desvolopament, a la sosta dels predators.
 
Tres còps avián ensajat de la tornar a la natura, mas totes los còps ela tornava en cò dels umans. Segon las analisis d’ADN que lo Conselh General d’Aran faguèt dins un laboratòri de Grenòble (Arpitània), sos parents son l’ors Pyros e l’orsa Fadeta. Aubèrta es a l’encòp filha e felena de Pyros, qu’es tanben lo paire de Fadeta.
 
Se sap pas per quina rason l’orsalhona se separèt de sa maire. Al delà, “cau remercar qu’Aubèrta serie frut d’un prumèr enfantament de Fadeta, neishuda en 2010, e qu’era ei ua mair primairenca e sense experiéncia, e açò poirie refortir era ipotèsi d’ua separacion accidentau de forma naturau”, çò ditz lo govèrn aranés.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Mathieu Castel Marselha
1.

Pauretona ! Aquò dich, m'estonariá pas que l'aguesse quauquaren de veire amb la pauretat genetica de sa raça, estent que son paire es au còp son grand paire... Deu èstre malurosament un pauc nèscia...

Aparentament, lo Pyros en question (lo paire) enfantèt un paquetàs d'orsalhon sènsa tròp se socitar dei problèmas ligats a la practica de l'incèste.

Bessai que faudriá pensar ara d'introdurre un autre mascle per diversificar un pauc tot aquò.

  • 3
  • 0

Escriu un comentari sus aqueste article