L’Hamas ven d’anonciar que tendrà pas la trèva de 72 oras amb Israèl perque l’estat ebrieu accèpta pas sas condicions, qu’èran la fin totala de l’embarg, la fin del blocatge de las frontièras e far foncionar lo pòrt maritim.

 

L’armada israeliana es ja a bombardar la Lista de Gaza, del temps que l’Hamas a tornat lançar de fusadas.

 

Mentre que se debanavan las negociacions discretas entre Israèl e l’Hamas en Egipte, lo secretari general de l’ÒNU, Ban Gimun (Ban Ki-Moon), diguèt que n’aviá pro: “Cal contunhar aital? Bastir, destruire e bastir e destruire! Bastirem un còp de mai, mas deu èsser lo darrièr còp que rebastissèm”, çò diguèt Ban en disent clar qu’“aquò se deu acabar ara. Cal tornar a la taula de negociacion. Podèm pas repetir la meteissa causa periodicament.”

 

Aquel plan de Ban Gimun se deuriá materializar en Egipte, ont de representants israelians e palestinians an negociat amb la mediacion de las autoritats egipcianas.

 

Israèl declarariá l’alta al fuòc se l’Hamas se desmilitarizèsse e liurèsse totas las armas. Al delà, insistís qu’es l’Hamas que se deu responsabilizar dels mòrts en Gaza perque auriá pogut evitar l’atac de l’armada israeliana. Del costat palestinian, se ditz lo contrari: lo responsable de la crisi umanitària en Gaza es l’invasion e l’ocupacion d’Israèl.

 

De son costat, lo president dels Estats Units, Barack Obama, reconeguèt tornarmai lo drech d’Israel de se defendre dels atacs de l’Hamas, mas aqueste còp sembla qu’ensagèt de prene en compte timidament lo sentiment dels palestinians. Dins aquel sens, Obama a parlat d’“una solucion qu’assegure la seguretat a Israèl e, a l’encòp, qu’ofrisca l’esperança a las gents de Gaza e que las isolarà pas del Mond permanentament”.

 

Fins ara, aqueste darrièr conflicte a causat la mòrt de 1800 palestinians, la majoritat de civils, e 9500 ferits. Del costat israelian, los mòrts son 64 soldats e 3 civils.