Bandièra01 1180x150: Comuna de Tolosa

Actualitats

crotz-tolosaCreated with Sketch.LemosinMarchaNauta Marcha

Drama familiau en Nauta Marcha: lo petit desparegut es estat retrobat mòrt

Loan, lo nenet qu’èra estat declarat enlevat, es estat retrobat mòrt rasís un estanh de Sant Soupise las Chams (Nauta Marcha). Los parents reconeguèron lo murtre questa dimenjada e son estats encarcerats dins la nuech de diluns a dimars.


Podián pus suportar los plors de lor enfant. Quò es çò que declarèron los parents dau petit Loan, retrobat mòrt, enterrat rasís un estanh de la comuna de Sant Soupise las Chams. Un estanh que ’perten au comitat d’entrepresa de la filiala d’Electrolux ont trabalha lo grandpair de Loan. Los parents dau petit i anèron sovent per permenar o peschar. Segon lo procuraire, quò es Cédric Danjeux, lo pair, que batèt lo petit a mòrt. Vai sègre una mesa en scèna macabra per escondre la desparicion de l’enfant: contunhèron de preparar los tetarèus e mai permenèron emb una monaca de plastic dins la charretona. Puei venguèt la messonja sus l’enlevament dau drollichon: un individú l’auriá pres dau temps qu’èran a jugar a las bolas segon çò que declarèron a la gendarmariá de Charnalhas, dimècres passat. La mòrt dau nenet data dau 20 o 21 d’aost. La mascarada durèt una desena de jorns.
 
Queu parelh es seguit socialament. Lo contèxte familiau es plan complicat e marcat per la violéncia. Aitau, fai tres setmanas, Frédéric, un daus nòu frairs e sòrres dau pair de Loan, se suicidèt a la preson de Garait. Deviá èsser jutjat per un murtre comés au Buçon en aost de 2013. Cédric, se, segon los familiars, podiá èsser violent coma sa companha.
 
Dins la nuech de diluns a dimars, los parents son estats mes en examen. Lo pair per violéncias agravadas avent entraïnat la mòrt sens intencion de la balhar. La mair, Christelle Morlon, per non-assisténcia a persona en dangier, recapte de cadavre e denonciacion de fachs imaginaris. Risca 7 ans de preson e lo pair 20. Son encarcerats a Limòtges per la mair e en defòra de Lemosin per lo pair, mai que mai, per lor seguretat. D’efiech, segon l’avocata de Christelle Morlon, de las gents se son amassadas davant lo tribunau de Limòtges diluns d’aprèsmiegjorn en cridant “A mòrt!”
 
 
 
 
Maime Caillon



Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Maime Limòtges
3.

#2 Efectivament, una istòria similara (murtre d'un petit e messonja daus parents) se debanet rasis Clarmont-Ferrand. Auria pogut ne'n parlar perque los enquestaires l'avian en memòria.

  • 1
  • 0
Gabrièu Balloux Bordèu
2.

Tarribla istoèra. Mès me sembla auger dejà vist quauquarren antau, i a quauques mes o setmanas.

  • 2
  • 0
Terric Lausa Quilhan
1.

Las tragèdias d'aquesta mena se pòdon dificilament prevenir. Totun, se lo contèxte familial èra tant cargat coma aquí ja que fasián l'objècte d' un seguit social, me demandi cossí aquestes servicis socials an pogut daissar demorar lo nenet dins aquesta familha. Aquò pausa la question de l'eficacitat del seguit social dins l'estat francés que sovent es paralizat per la longor de las proceduras e per la manca de mejans. Me sembla que çò mendre que se pòt far es la mesa en plaça d'un enquèsta administrativa independenta per estudiar de quina manièra s'es mes en plaça lo seguit social e s'i a agut de mancanças e d'errors. Es inacceptabla l'idèa que s'aja pogut fisar la vida d'un neneton entre las mans de dos capbords ultra-violents e pervèrses en tota coneissença de la situacion.

Que trape la patz aquesta paura arma inocenta.

  • 11
  • 1

Escriu un comentari sus aqueste article