Bandièra01 1180x150: Comuna de Tolosa

Actualitats

crotz-tolosaCreated with Sketch.ProvençaProvença

En Provença tanben, la dreta cula

Bruno Gollnisch
Bruno Gollnisch | Gauthier Bouchet

Solide, aquí s'i pòt pas parlar d'èrsa ròsa, e los electors provençaus capvirèren pas las costumas. La dreta demòra majoritària dens l'est occitan, mès ved sas pausicions tremoladas per la pujada deu vòte PS.


Desillusion per l'extrèma dreta
 
Sàber si lo Front National tornaré sedusir los electors tant com per l'eleccion presidenciala, aquò èra un enjòc màger d'aqueths comicis en Provença.  Lo purmèir torn avè plaçat una bona quantitat de candidats FN en pausicion de se mantenir e d'esperar. Ajudats per un tractament mediatic que participèt activament a la dediabolizacion deu partit, e per una campanha animada de tèmas reaccionaris qu'aurén divut servir lo movement d'extrèma-dreta, lo FN capitèt pas de transformar vertadeirament l'ensag.
 
Vrai, lo partit fondat per Jean-Marie Le Pen torna a l'Assemblada Nacionala, e los dus deputats deu movement venen de Gard e de Vauclusa. Mès a l'òra que mantuns observadors e analistas se planhen d'una situacion que disen "antidemocratica"», e veden com injuste lo hèit que lo FN sii pas mielhs representat au parlament, compte tingut de sas resultas electoralas, se pòt pas sonque constatar la mes·hidança deus electors au moment de causir deputats FN. De hèit, los cadres deu FN perdoren: Bruno Gollnisch (Var), France Jamet (Erau, hilha deu vici-president deu FN), com Louis Alliot que s'inclinèt en Catalonha, o Marine Le Pen que capitèt pas de ganhar la circonscripcion de Hénin Beaumont (França). Las victòrias venen d'un estrangèir au movement (Gilbert Collard, que se presentèt eth-medish com un electron libre) o d'una candidata portada peu son nom d'ostau mei que per son carisma politic, Marion Maréchal-Le Pen (arrèr-hilha de J.M Le Pen e hilha de Samuel Maréchal, un ancian cap deu Front National Jeunesse). Jacques Bompard, de la Ligue du Sud, se ven hornir ad aqueths deputats frentistas.
 
Se pòt pas denegar la pujada deu vòt FN, segur: lo nombre important de candidats presents au segond torn ne testimònia. Mès a la fin, las resultas ne son pas tant bonas per l'extrèma-dreta, que se pòt pas amagar darrèir arguments complotistas. Mei que de rason, sons candidats avoren dret a la paraula, e se podoren exprimir shens estar atacats suu contingut maupudent de sons programas. E totun, maugrat la complasença de la dreta dita "republicana", lo FN capita pas de mandar mei de dus deputats a París, pròva de l'escassa adesion de l'electorat a las soas idèas.
 
 
L'UMP demòra mèste a casa
 
Atau, com anonciat au sèir deu purmèir torn, la carta demòra blava en majoritat. Dab mantuna opausicions entre UMP e FN au dusau torn, gràcias aus desistaments deus candidats PS, l'UMP hadot dimenge lo plen de vòtes, dens parçans que li son tradicionalament aquesits. Christian Estrosi, lo conse niçard, s'impausèt dab 63,4%, Josette Pons dab 60,5% (dens lo Var) o Bernard Deflesselles dab 62,6% deus vòtes (Bocas deu Ròse). Ça que la los escarts estoren pas tostemps tan marcats: 300 vòtes desseparan per exèmple Julien Aubert, elegit, de Jean François Lovisolo, en Vauclusa, e Christian Kert l'empòrta dab 51% deus vòts tot dòi (Bocas deu Ròse).
 
L'est occitan, tradicionala empara de la dreta, demòra dens sas costumas, atau. Losera, Aups-Maritims, Var e Vauclusa (manca la purmèira circonscripcion) causiren de mandar pas sonque deputats de dreta a l'Assemblada Nacionala, atau com las circonscripcions de Rodés e de Milhau, mei a l'oest. Mès peu camp progressista, las resultas son plenas d'esper, pasmens.
 
 
Lo PS s'impausa en circonscripcions claus
 
Com pertot alhors en l'Estat francés, lo PS acaba aqueras eleccions en hòrt bona pausicion. En 2007, l'UMP s'ic avè tot emportat, quasiment: 34 circonscripcions sus las 39. Uèi lo dia, lo rapòrt de fòrça s'equilibra regde: 17 per l'UMP, 15 peu PS, e 2 per l'extrèma dreta.
 
Signe d'aquera evolucion, las victòrias deu PS dens mantuna ciutats màgers de Provença. A Marselha, quate de las set circonscripcions son ganhadas peus socialistas; Renaud Muselier, cara nacionala deu partit de dreta, i es d'alhors batut per Marie Arlette Carlotti. Hòrt simbolic, lo centre d'Ais de Provença, tanplan, serà representat per lo PS Jean-David Ciot. Vitròla passa a l'esquèrra, egau, après la des·hèita deu sortant UMP Eric Diard.
 
Delà las victòrias simbolicas, lo PS capitèt gèir sa resulta milhora dempuish 1981. Provença e tot l'oest d'Occitània se'n sentissen, e l'UMP ved sa dominacion limitada, encara que demorèssi plan viva.




Pèir-Joan Masdiset

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Montanhòl
3.

De notar que l'est de Gavotina (04+05+sud 38) votèt senèca.
L'oèst e lo sud de Gavotina (Droma e Alps Marinas per lor part gavòta) votèt drecha. Causa possibla : de regions ben poplaas (en opausicion ambé 04+05+sud 38) amb'una creisséncia de populacion continua e en perda d'identitat occitana ?

  • 2
  • 0
Pirolet
2.

Ai doblidat: Daniel Mach es estat batut per Jacques Cresta, PS. Alliot faguèt 3n.

  • 0
  • 0
Pirolet
1.

Alliot se desistèt pas e a fach tombar lo deputat sortent de Perpinhan centre, Daniel Mach. Es dins la cisconscripcion de Ribesaltes que la candidata FN se desistèt per empachar la candidata socialista d'ésser elegida, e malgrat aquèlas manòbras se'n manquèt pas gaire que passèsse.

  • 1
  • 0

Escriu un comentari sus aqueste article