Bandièra01 1180x150: Comuna de Tolosa

Actualitats

L’espanholisme capita mal a Barcelona

A Madrid, Felip VI presidís per lo primièr còp coma rei lo desfilat militar

| Ber
Los partits espanholistas e la plataforma Societat Civila Catalana convoquèron ièr a Barcelona, en escasença del Jorn de l’Ispanitat, un acamp per revendicar l’espanholitat de Catalonha. E mai s’avián publicat la crida als mèdias e s’ofrissián d’autobuses gratuits per se desplaçar a Barcelona, los espanholistas an amassat mens de mond qu’arunan e a pena ocupèron lo centre de la Plaça de Catalonha.
 
La manifestacion se passava a l’escasença del Jorn de l’Ispanitat, e la tòca dels organizaires èra de metre en evidéncia qu’en Catalonha i a tanben de ciutadans que vòlon pas l’independéncia del país. I manifestèron los partits unionistas radicals, PP e C’s, amb de movements neonazis e franquistas.
 
 
Petita concentracion faissista
 
De matin, aperaquí 300 individús de grops ultradrechistas marchèron cap al Pargue de Montjuïc, en revendicant l’espanholitat de Catalonha. Los acampats faguèron una ceremònia a la bandièra espanhòla, en lançant de messatges nostalgics de la dictatura franquista e de menaças. Se cremèron qualques bandièras independentistas catalanas e menacèron de “rebentar” lo referendum consultatiu per l’independéncia.
 
 
Desfilat militar a Madrid
 
La monarquia espanhòla centrèt la celebracion del Jorn de l’Ispanitat a Madrid. Après una recepcion e un brinde al palais reial, Felip VI presidiguèt, per lo primièr còp coma rei, un desfilat militar que recuperava l’exibicion de l’aviacion, que pendent dos ans s’èra pas facha per manca de budget. Los caps dels partits politics acompanhèron lo monarca dins l’eveniment, e tanben los presidents de las comunautats autonòmas levat los de Catalonha, lo Bascoat e Astúrias.
 
 
De “Fèsta de la Raça” a “Jorn de l’Ispanitat”
 
Lo 12 d’octòbre de 1492, Cristòl Colomb arribèt a l’illa de Gunaní. En commeracion d’aquela “descobèrta” d’America, lo rei espanhòl Anfós XIII adoptèt la data coma “Fèsta de la Raça”. Aquel eveniment se celebrèt pendent lo franquisme en tot exaltar la colonizacion espanhòla d’America e en venent lo jorn nacional d’Espanha. En 1958 se cambièt lo nom per “Jorn de l’Ispanitat”.
 
Après lo franquisme i aguèt lo debat de cambiar la fèsta “nacionala” al 6 de desembre, “Jorn de la Constuticion”, mas fin finala, en 1987, lo govèrn socialista de Felipe González establiguèt per lei lo 12 d’octòbre amb lo nom oficial de “Fèsta Nacionala d’Espanha”.













Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pascau
2.

B'ei interessant de véder que los conflictes de nacionalitat en Catalonha viénen de luenh e quin son ligats a l'istòria politica d'Espanha!!!

Mercés per aqueste article!

  • 5
  • 0
Cristian FORMENT AGEN
1.

Sòrta, son"quatre gats" que te pòdon bramar:"La puta madre que te parió!"

  • 3
  • 0

Escriu un comentari sus aqueste article