Bandièra01 1180x150: Comuna de Tolosa

Actualitats

Espanha victoriosa en un encontre vuèit

| Laurence Griffiths/Getty Images

Per aver esperat un encontre disputat e engatjat, èm estats hòrt decebuts ! Ger ser a Donetsk, avèm shens nat dobte assistit a la partida mei lèda d'aqueth Euro 2012 e quitament lo public èra pas deu nivèu d'una competicion internacionala. Maugrat una tactica pro defensiva, França a pas sabut defénder com cau per empachar los espanhòus de mercar e de s'impausar 2 a 0 shens jamèi forçar lor talent.

Après vint minutas de jòc, Espanha a obèrt la marca per Xabi Alonso, sus un desbordament d'Alba seguit d'un centre. Un gol qui ei arribat après un long periòde de calme e qui malurosament a pas briga accelerat lo ritme d'aquera partida. Sols en ataca, Ribéry e Benzema se son bolegats per ren e l'Equipa de França ei estada incapabla de har seguir mei de tres passas shens pèrder lo balon. Manca de tecnica, mes tanben de collectiu e de motivacion, aquò ei mei grèu enqüèra.

Son pas tanpòc los espanhòus qui an hèit pujar lo nivèu. Se son sovent contentats de har virar la bala e d'esperar los francés qui d'alhors son pas jamèi vienguts. Dab un jòc atau, ei complicat d'imaginar quin Espanha se poderé impausar contra Alemanha, qui demora favorida per anar dinc a la finala. Quitament los portugués en mieja finala poderén pausar problèmas a la Roja. En las darrèras segondas de jòc, l'Espanha a totun doblat l'escòre dab un penalti marcat per lo madrilenc Alonso qui hestejava ger sa 100au seleccion dab un doblat.

Per paur de pas aver pro anujat los espectators sus lo terrenh, Karim Benzema a près lo micro a la fin de l'encontre. Declarava en sortir de l'estadi: "èm caduts contra la mei bona equipa deu monde, Avèm plan jogat, tots avèm hèit una granda partida". Una granda partida donc? Un tir cadrat per tota la partida (sus un còp franc de Cabaye), duas o tres ocasions ... una simpla question d'interpretacion fin finala.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Joan Miró Font Eivissa
2.

M'èra personalament parièr qual ganhèsse dempuèi dos, representan s'estats que nos oprimisson

  • 2
  • 0
garric
1.

Desfacha pitosa. D'unes dison que França es pas un país de fotbòl (es a dire de fotbòl de massa). Aquí n'avèm una novèla demonstracion.

  • 0
  • 0

Escriu un comentari sus aqueste article