Bandièra01 1180x150: Comuna de Tolosa

Actualitats

Deman manifestaràn los pròrestanca de Sivens

Tarn Ruralitat crida a manifestar en nom del “restabliment de l’òrdre republican” e manda un corrièr a 3000 elegits. L’associacion occitanista Lo Clusèl sosten aquela manifestacion

Après la decision de suspendre las òbras de la restanca de Sivens, ara ven als collectius favorables a la restanca de se mostrar. Manifestaràn deman dissabte a Albi, en nom del “restabliment de l’òrdre republican”. La manifestacion començarà a 14h a la sala de las fèstas dels Prats Graussals e marcharà fins a la plaça del Vigan. Los manifestants marcharàn darrièr la bandièra de Tarn Ruralitat, una associacion qu’agropa de sindicats, d’associacions e d’elegits.
 
Del costat occitanista, sosten la crida l’associacion Lo Clusèl. Segon aquela associacion ciutadana, la restanca es necita per “assegurar los provesiments en aiga per garentir la regularitat dels debits dels rius (aiga bassa) e l’irrigacion agricòla”. Dins aquel sens, l’associacion occitanista afirma “qu’Occitània deu demorar una nacion agricòla desvolopada”.
 
Del costat de las autoritats, Sylvain Fernandez, president de l’Associacion dels Cònsols e Elegits de Tarn, a mandat un corrièr a aperaquí 3000 elegits en los convidant, “provesits de las insígnias de la Republica [francesa], a jónher lo rassemblament”. Fernandez a dich dins La Dépêche que cèrcan “pas d’empurar lo gavèl” mas que demandan que “lo ròtle dels elegits siá respectat”.
 
Qualques elegits son pas contents d’aquel corrièr qu’an recebut. La Dépêche conta la reaccion de David Kowalczyk, elegit ecologista de Sant Juèri (País d’Albi). Kowalczyk s’estona de la crida a manifestar en nom del “restabliment de l’òrdre republican”. “An otrapassat las missions de l’associacion”, çò repròcha, mentre que pensa que cal far un debat public. Al començament de la setmana que ven, un grop d’elegits opausats a la crida de Tarn Ruralitat respondrà al corrièr de Fernandez. O faràn pas abans, precisament tanben per “evitar d’empurar lo gavèl”.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ji
3.

Lo PNO en manifestant pel “restabliment de l’òrdre republican”. E ben....

  • 6
  • 0
Pirolet
2.

#1 As plan fach de remembrar tot aquò. Siái filh de paisan e n'ai un confle d'aqueles agricultors que son trabalh es pas que passejar amb de tractorasses quand an lo temps perdeque senon son pro ocupats a taulejar amb lo mond politic, o entre eles a la FNSEA.

  • 7
  • 0
Joan-Pau
1.

Es subretot una manifestacion de l'FNSEA. Dimècres de la setmana passada, son eles que venguèron per exemple a Tolosa e qu' espandiguèron de fems per l'estacion de mètro Joan Jaurés (tanben per las vias del tram o encara per la veirina del local d'Euròpa Ecologia Los Verds). Son eles que deslarguèron de rats d'aiga davant de prefecturas o que faguèron cremar un ostal de las talhas en Bretanha qualques meses i a. Son eles que saquegèron lo burèu d'un ministèri e que jamai son pas estats jutjats o arrestats. La polícia o la justícia se mainan pas d'aqueles ''agricultors''. An lo dreit de far çò que vòlon, son de personas protegidas. Aquela restanca tòca sonque l'interès de las gents de l'FNSEA: ''cal far d'agricultura productivista per vos far manjar a totes'' çò dison. Mas i a quicòm que truca pr'aquò: aquel biais de far non empacha que fòrça mond contunhan de crebar de fam en Africa o endacòm mai.

  • 11
  • 0

Escriu un comentari sus aqueste article